ياما عطيتي تمر من دون تقصير عزّ الله إنك رمز خيراً .. كريمه

اعجاز نخل روحت باقي اطلال
مثل العمر يمضي على طول الأيام
ياما تلاحوا دونها طولة البال
ناس تصاليها وفي حبها هيام
والسيل يملاها من الجال للجال
اليوم يبّاسٍ.. وعوجٍ.. ونيّام
حمد عبدالله الوايلي - حوطة سدير
النخله الوسطى بقت بينهن شاهد
واقفا الزمن باللي بقا مع اهلها
يا ماحلا بين الحقول وصِياهد
سَجِّةٍ بالرجل تمشي مهلها
شَوف الآثار ومابها من مِشاهد
فيها المحبَّه والعِبر ما احدٍ غَفَلها
سعود عائش الحربي - جدة
نخيل في وسط المزارع كثيره
رمز العطا رمز الوفاء دوم نبراس
بالطيب مذكوره.. وخيراً وفيره
كلٍّ عشقها من عديدين الاجناس
نورة الفاضل - بريدة
راحت سنين العمر يا نخلة الخير
بعد العطا والفضل صرتي عديمه
ما باقيٍ غير الكرب والعصافير
والصوره اللي خالده مستديمه
ياما عطيتي تمر من دون تقصير
عزّالله إنك رمز خيراً .. كريمه
خالد بن ناصر المخيمر - روضة سدير
نرحب بمشاركاتكم الشِّعرية، وما تلتقطه عدساتكم
من الصور الهادفة والطريفة على إيميل الخزامى:
rb-khozama@alriyadh.com
صورة العدد السابق