اللغز هذا فيه فن وبراعه والحل جن امنوا بالنبيين

كتب لغز الأسبوع الماضي الشاعر محمد البشري من رياض الخبراء والذي يقول:
ابنشد اهل العرف ويش الجماعه
اللي لهم ذكرٍ من اول وهالحين
تجمعوا مصغين سمعاً وطاعه
ومن العجب عادو لهلهم على الدين
ولم يتوصل للرمعة الصحيحة من أصل 76 حلاً سوى:
اهلا هلا ماخط كاتب يراعه
وسلام اكثر للرجال الميامين
لعلي بن موسى وعادي ذراعه
مع بكر وسنين تعدن ثلاثين
واللغز هذا فيه فن وبراعه
والحل جن امنوا بالنبيين
عبدالله طلق العتيبي - الطائف
لغزك يا بشري فيه ذوق وسناعه
والحل عندي عارفه زين ما زين
هذولا جن آمنوا بظرف ساعه
على يدين المصطفى مرجع الدين
صالح بن إبراهيم السنيدي - الحرييق (الوشم)
يا محمد البشري اصبت البراعة
بلغزك الوارد علامة وتظمين
حله جماعة جن واحسن جماعة
طاعوا رسول الله لهم زود تمكين
علي الرشيد - رياض الخبراء
رمعت لغزك يا محمد ارماعه
يمكن تصيب ويمكن تجنب ايمين
الجن عقب أصغايتن واستماعه
للذكر عادو مسلمينن مطيعين
فهد سعود الدوسري - الزلفي
لغزن قريته فيه فن وبراعه
لمحمد البشري طليق الحجاجين
الجن تعجب من الكتاب وسماعه
فأمنوا به عقب ماهم مضلين
منير مذكر متعب العضياني
لغز الأسبوع
كتب لغز هذا الأسبوع الشاعر حاتم عبدالله الغريري من الشنان ويقول:
ابغى انشد اللي فاهمينن بالالغاز
وانشر لنا يابورجا بالجريده
وش بنت له فضل كبير به اعجاز
غطت على رجلين شافوا مكيده
اول وثاني حرف جر اذا جاز
وثالث الى آخر حرف غطى حديده
وخامس وثاني حرف مع الالم جاز
وسادس وثاني حرف عشره اكيده
نستقبل الرمعات والحلول خلال أربعة أيام من نشر اللغز على الإيميل:
rb-khozama@alriyadh.com