أنتِ قصيدةْ منظرك يعجب العين والأذن تطرب حين تسمع لك ابيات

كتب اللغز السابق الشاعر عبدالله زبن الأسلمي من حفر الباطن والذي يقول:
انشدك عن (بنت) تشوق الملايين
خواتها من كل بحر كثيرات
اول وثاني حرف قطع بسكين
وثالث ورابع بنت بالجسم بالذات
وثاني وثالث ورابع هوايه وزين
ورابع مع الاول قديم من الاصوات
ومع شكرنا لمن شارك ولم يتوصل للرمعة الصحيحة وشكر أكبر لمن توصل للرمعة الصحيحة وهم:
يالاسلمي لغزك على الراس والعين
لكم تحايا بالملايين ميات
حله قصيدة ما بها قول تخمين
اللغز مليان ولابه امراوات
علي الرشيد - رياض الخبراء
يا مرحبا بالاسلمي فيك فرحين
يامرحبا بك و باللغوز الجديدات
يا مرحبا والحل عندي وهالحين
حله قصيدة والقصايد كثيرات
محمد بن عبدالرحمن - أبو دحيم - البدائع
يا مرحبا بك عد ماشافت العين
واعداد ما داجو كثيرالمسارات
يا بنت يلي عارفينك من سنين
ترى القصيده تبني لها منارات
وكم واحد رايح والمده الفين
والقول باقي فيه عدة مدارات
حمد عبدالله الوايلي - حوطة سدير
الربوع الكل اليومه محترين
بِه صفحةٍ تجمع عزيزينٍ ثِقات
واللغز يا عبدالله ياذرب اليمين
كِل ما به مِن معاني قيِّمات
قصيدةٍ والحل باذن الله يقين
خواتها ابصفحة خزامى واجدات
سعود عائش الحربي- جدة
يابوزبن حليت لغزك ببيتين
عبر الخزامى لك سلام وتحيات
هذي قصيدة يعشقونة ملايين
خواتها من كل بحر كثيرات
عبدالله السياري - الرياض
يا بنت يا اللي كل يومٍ تمرّين،
على الضمير ولك ولادةْ بساعات.
أنتِ قصيدةْ منظرك يعجب العين،
والأذن تطرب حين تسمع لك ابيات.
إبقي على مرّ الزمن في الدواوين،
شهادة انّ الشاعر ابدعك بالذّات.
محمد مقحم المقحم - الرياض.
الله يحيي كل ناس عزيزين
واهل الحفر لهم منا التحيات
وترى القصيدة حلنا يافهيمين
واللغز محبوك ولا فيه حيلات
معوض محمد الجهني - المدينة المنوره
لغز الأسبوع
كتبه للصفحة الشاعر نواف هايف الجبرين من الرياض ويقول:
ياويش بنت شافها آلاف وآلاف
رغم المهابه كل مسلم نظرها
خلانها تاقف لهم خوش ميقاف
واللي مجافيها يلاقي حسرها
اول وثاني حرف للشخص ميلاف
وان زدت ثالث حرف نفس وقدرها
وآخر ثلاث حروف معكوسه اتلاف
مايذكر احد ن ياجماعه غمرها
نستقبل الحلول خلال «ثلاثة أيام» من نشر اللغز على إيميل الصفحة:
rb-khozama@alriyadh.com