عريف فصل كان غاب الستادي وبعض المشاكل يارفيقي يحله

كتب لغز الاسبوع الماضي للصفحة الشاعر ابراهيم العجيمي شوفان والذي يقول :
وين أنت ياللي للحجاوي تنادي
لاشك عندي لغز ودي بحله
ياويش رجل بالوصايف قيادي
أربع حروفٍ مالقو فيه خِله
تلقاه واقف والسوالف تمادي
يفطن لها ذيبان من دون ذَله
ماهوب متزوج ورجلٍ حيادي
يخاف منه البعض لو فيه شله
ينسب لرجلٍ من ثلاثه وكادي
حروف من بين الأماكن تدله
وهناك حلول كثيرة وردت لإيميل الصفحة ولكن الكثير منها رمعاتهم غير صحيحة ولم يوفق للحل سوى :
يوم الرِّبُوع يقدم اللغز عادي
بصفْحة نِشاما مِع مِعِدٍّ نِجِلِّه
حل اللغز في رمعِتِي ياستادي
عريف فصل ولازم يكون عله
سعود عائش الحربي - جده
يامرحبابك عد نبت الوهادي
وعد الكلام الزين دقه وجله
أبشر بسعدك بأمر رب العبادي
ياللي حبكت اللغز وتريد حله
جابه وواثق ماهو قول اعتقادي
يقوله اللي حل لغزك فطن له
للي يصيده واقبلوا لاجتهادي
عريف فصل وبعض الأوقات عله
محبكم : صالح الزرير التميمي - الرس
اللغز يا شوفان زين السنادي
وانا لقيت الحل وافخر بدله
هذا عريف الفصل شغله قيادي
شكري لابونواف دايم وآجله
علي رشيد الرشيد - رياض الخبراء
يالله يارفاع سبع عمادي
ياواحد بيديه دقه وجله
قريت لغزك يارفيع المبادي
وعريف فصلك يافتى الجود حله
ملوح الجنيدي - الرياض
اللغز صعب وجبت كل اجتهادي
واظن جبت الحل وابديت حله
عريف فصل كان غاب الستادي
وبعض المشاكل يارفيقي يحله
عبدالله عايد المفضلي - الرياض
يابادع لغزه بصفحه لعادي
ولغزك قوي ماكل شخص يحله
عريف فصل وله مكانه وكادي
والحل اظنه صح والعالم الله
عبدالله الزبن - حفر الباطن
لغز الاسبوع
كتب لغز هذا الاسبوع معد زاوية اللغز ويقول :
ياويش بنت ساكنه في طرف بنت
خواتها اربع وابحثوا يامداوير
اول وثاني حرف مشروب لي وانت
وثالث ورابع حرف وسط المعاصير
نستقبل الحلول خلال «ثلاثة أيام»
من نشر اللغز على إيميل الصفحة:
rb-khozama@alriyadh.com