لا صرت في ضيقه وطوّل مداها

الصبْر مفتاح الفرج و احمدالله
دنياك ماهي دوم تعطي حلاها
مابين عسرات و رخاء و احمدالله
وان كان شفت الناس زود بغناها
ارضىْ بما ربي قسم و احمدالله
ما خاب من هو بالقناعه حواها
كنزاً ثميناً امسكه و احمدالله
لا تنتظر من ناس شيّ بعطاها
اعمل وثابر وجتهد و احمدالله
ترى عزيز النفس يحسب مداها
اريال لو تكسب فخر و احمدالله
والنفس اعْدل دربها عن شقاها
اربط شياطين الاذى و احمدالله
ابليس واعوانه يقدّم خطاها
لا تتبعه في زلته و احمدالله
احذر تشمّت ناس فيها بلاها
اطلب من الله عافيه و احمدالله
العافيه غالي ترى مشتراها
لله واجب تشكره و احمدالله
لا تقرب الشّكات واللي وراها
ترتاح من كثر العنى و احمدالله
ولا تسيئ نيّاتك ويلحقك اذاها
حسّن ظنونك وبتعد و احمدالله
هذا قليلاً من كثيراً تراها
أوصيك ابحث و استفد و احمدالله
مقرن بن متعب الهرف