بعض الاوادم ما يخلي الشذايب

قال الجريش وقوله الحين جايبه
متواردات افكار فكره نجايبه
يبيبها نصحٍ وفصحٍ بقوله
يبيبها شيٍّ يجمّل غرايبه
قدّام ربّ البيت يرجيه فضلها
يمشي عليها كل ورعٍ وشايبه
شيٍ بهالدنيا يغذا على الجهل
وبلاوي السيّات تكثر سبايبه
ياسعد عين اللي يجيله وينثني
وياشيب عين اللي فلاهوب سايبه
اشوف لي ناسٍ بهالخلق تاكل
تاكل لحمها دوم ماهيب تايبه
بعض الاوادم ما يخلي الشذايب
بالناس يشنى ماتوقف شذايبه
دايم على اعرض الاوادم يطرّي
مدبر عسى ربي يهدي صعايبه
خلا لسانه للسبابه ودربها
عنده مرض بالقلب تخشى عقايبه
لاقلت وقف قال مالك ومالي
يزود لاهدّي وتكبر ضرايبه
يبطش لسانه والحقايق يكمّها
والزيف بادي داعي السّوء صايبه
شين صحيح وشي قولٍ مصفصف
يجني بها الجاني دبور وعتايبه
الزور والبهتان والسّب بالقفا
طبعٍ ردي بالسلم والدين عايبه
ف الله يثبتنا على سنة محمد
من لا تبع هديه وطى كل خايبه
يالله تغفر كل ذنبٍ علينا
اعمارنا تفنا والاقدار غايبه
موت الفتى والذنب فوقه معلّق
مصيبة ماهي من ادنا مصايبه
مصيبة ياشينها من مصيبه
يموت وأعماله على غير طايبه
ياسامعٍ قولي على الزين والهدى
كلٍ عليه ابليس سلّط حرايبه
ابليس ماخلا جميلٍ بحلّه
وابليس ماوقف ويشعب ركايبه
قبل الفوات احرص تصفّي حسابك
قبل الفنا تسهل ويسهل عصايبه
اليوم تبداها ولا هيب تجّل
ياعونت الله جنّته عن لهايبه
دامك بهالدنيا عليها بتقدر
ولاقفت رحا الدنيا فلاهيب جايبه
يامفنين عمرك على السّب والجهل
للزين حدحدها ترى الطيب نايبه
خلّ القدر لاجاك مارحت نادم
والروح لاقبضت ولا النفس آيبه
ترتاح بالدنيا وترتاح ععقبها
لو جاك نَزَعَ الموت مانتاب هايبه
وختامها صلو على خِيرت البشر
ياسعد من خلّا كلامه زهايبه