وقت اللقاء تحتاج أمورٍ مهمات

بالشعر يمكن ينفتح لك مجالات
ومن بينك وبينه يصير اتفاقي
في خاطري موضوع في نظم الأبيات
يمكن يفيد أهل البلد والطراقي
وقت اللقاء تحتاج أمورٍ مهمات
احرص لها والخير بالناس باقي
حاول لخطواتك ترتب مسارات
وتوفيقك من الله وبأمره يساقي
دوّر رضا المعبود رب السموات
يرزقك في حكمة وبأسلوب راقي
حسن التعامل والنوايا السليمات
ترفع مقامك باللقاء والفراقي
وأحسن ظنونك والعواقب حميدات
نفسك لا ترهنها بما لا يطاقي
وسع خيالك لا يجي فيك شكات
خل الثقه عندك على أوسع نطاقي
اطلق حجاجك والليالي قصيرات
وابعد عن الشرهات وقت التلاقي
لا بد ما تحتار في بعض الأوقات
ومن كان لله نيته ما استضاقي
وإن وافقك ناسٍ بهم حب للذات
غير العنا بأسبابهم ويش لاقي
لا تنزعج لا شفت بعض الحركات
من ناس في تفكيرها الانغلاقي
لا يمكن تغير طبايع وعادات
حتى ولو قيل اهتدى أهل النفاقي
قدمت موجز واختصرت المسافات
ومعناه ما حطيت دونه رواقي..