اللغز حله بشعة له طريقة والصدق يظهر للجماعة ويرضيك

كان لغز الأسبوع الماضي قد كتبه الشاعر محمد بن صالح محيا الحربي من الرياض والذي يقول:
عند البدو كانت أساس الحقيقة
تحولت لاسلاك تفضح دعاويك
لاشافها الحنشول يجف ريقه
واليوم في لمبات حمراء تباريك
وكانت الحلول الصحيحة:
ياحي لغزك والشعر ذا رحيقه
والحل دوك اياه والله يحييك
البشعه اللي مصدر لكل ضيقه
ولت وراحت جعل ربي يخليك
صالح البشري - الرياض
عند البدو كانت شبيه الحقيقه
بشعه ومن خوفك تبين خوافيك
والكمراء تفضح صورها عميقه
لاشافها الحنشول روح يباريك
خليف فهيد الحربي - الرياض
ياخوي مالك بالعلوم الدقيقة
تفكير بالماضي يغثك ويوذيك
واللغز حله بشعة له طريقة
والصدق يظهر للجماعة ويرضيك
على الرشيد - رياض الخبراء
ياللي طرحت اللغز تبا الحقيقه
هذي عادات البدو و انشد محاكيك
البشعه حل اللغز ماحد يطيقه
يابو صلوح اتعبتنا في غطاويك
محمد بن عبد الرحمن أبو دحيم - البدائع
هذي قديمة كان تبغى الحقيقة
البشعه اللي بالخفاء تكشف خوافيك
يمكن على لسانك تسوى حريقه
كانك بريء الله من الظلم ينجيك
سعد صنهات السهلي - الدرعية
النار في فم الحرامي حريقة
واحذر من الشيطان لاعاد يغويك
كانت مع البدوان هذا الطريقة
شيخ القبيلة من يفند دعاويك
محمد عبدالله الشهري - جبل اثرب
اللغز وصل بين رجل أو صديقه
هذي سجية للنشامى تقويك
الحل بشعة في عملها طريقه
في ماضي الازمان للصدق تهديك
خلف الحربي - بريدة
لاجابوا السراق ثم نشف ريقه
وجابوا له البشعه وقالوا بها هيك
يجيب طبلونه ويظهر شهيقه
اما اعترف والا صبر باح واحيك
صالح المرشود - الرياض
«لغز الأسبوع»
كتبه للصفحة الشاعر سعد صنهات السهلي من الدرعية ويقول:
انشدك عن شين يجيد الاشاره
يشر على شين خفى ماتشوفه
متاكدن وكاد هذا قراره
اللغز واضح يكشفنه أحروفه