اللغز

كان لغز الاسبوع الماضي والذي كتبه للصفحة منقولا من احد الشعراء الاخ عبدالرحمن بن عبدالعزيز البركة ويقول اللغز:
ويش المكان اللي انقل من مكانه
خالف قوانين الزمن والمكاني
علامة حطت لعذرا بيانه
في ساعة شدوا عليها الرهاني
والحلول من الشعراء:
بالقيس جيب عرشها من مكانه
قبل يرد الطرف وصل المكاني
العرش حل اللغز حله تكانه
في محكم التنزيل جالك وجاني
محمد عبدالرحمن العريني - أبو دحيم البدائع
قريت لغزٍ يوم جمعة زمانه
بسيط حله واضحٍ باالمعاني
جابوه الجن بكل حرص وأمانه
وبلقيس شافت عرشها باالعياني
احمد بن ناصر المحرج - الرياض
رمعت رمعه ماعليها ضمانه
عرشن لابو قيس المسماء يماني
خذوه ثم ردوه سرعه مكانه
مير المخفى للبشر صح باني
سعد صنهات السهلي - الدرعيه
لغز الجريده واضح في زمانه
له قصة ومبينه بالبياني
بلقيس حول العرش راعت كيانه
اللغز منقول ترى الحل هاني
عبدالمحسن بن محمد المحيسن - رياض الخبراء
ياللي كتبت اللغز مالك مهانه
اللغز مليان قوي المباني
الحل معروف خبرنا زمانه
بلقيس عرشه في قديم الزماني
علي رشيد الرشيد- رياض الخبراء
لغز الخزامى ياعرب في مكانه
دايم جميل موثق بالمعاني
الحل عرش بالقيس جابوه عانه
تراهنوا به وجيب له في ثواني
خليف بن فهيد الحربي - الرياض
وعلى وزن اخر:
لناقل اللغز وللشاعر صح لسانه
تحية و للمعد جزل شكري و عرفاني
لغزكم عرش بلقيس حله و تبيانه
و ناقله من محله عفريت من الجاني
أبو عبد الملك السحيباني - الرياض
وقد توصل الى الحل نثراً
خلف بن عايد السّحوم - بريدة
لغز الاسبوع
كتبه للصفحه الشاعر سعد صنهات السهلي من الدرعية ويقول:
انابنشدك عن رجلن أبطن امه ترى تغليه
ليا من نشدوا عنك يقول ويكشف اسرارك
ترى عنده علومك كلها والسر مايخفيه
يقول اللي فعلته لوتخشه داخل اظفارك
نستقبل الحلول على البريد الإلكتروني
rb-khozama@alriyadh.com
أو الفاكس 014871070