شفت الشعيب اللي به الخير محري عقب المزون وعقب برقٍ نثر ماه وسطه نياق تتدرج فيه بدري والناس تفرح بالمطر جو محلاه السيل روّح منحدر بس يجري وما مر في دربه يقشه ببمشاه وذكر الحيا مذكور والعشب يغري لأهل الحلال وكل ناسٍ تمناه والجو رايع والهوا هب نسري ماحلى التمشي فيه لاصرت تبغاه وحنا بربيع جابه الله بدري الحمد للي تسجد الخلق لرضاه خليف فهيد الحربي - الرياض يا قلب ياللي للمكاشيت مشتاق ابشر ترى كل الفيافي مليّه فيها المطر والعشب من كل الاذواق والناس للخدان روحه .. وجيّه ياما حلا المكشات مع وقت الاشراق ولحم الطلي مطبوخ مع شاذليّه يشوق عينك شوف حيران ونياق اعمارها ما بين حق .. ولقيّه خالد ناصر المخيمر - روضة سدير ما حَلَى شكل السما والجوّ غيم والمطر من فضلِ رَحمنِ يْهَمِي والثرى بْحِسْنه كما بسمة وسيم باسمٍ لو كان ما يملك فمي كلٍّ بْحبّ الحيا نفسه تهيم وكلٍّ بْحضن الطبيعه يرتمي هِيْ نديم اللي يبي نِعْم النديم قلبها شيخٍ يهلّي وْيكرمي بين ميِّ وْعشب وطْيُورِ وْنسيم متعةٍ تسري بروحِ ابن آدمي ارتعي يالإبل فِ الخير العميم من ربيع الأرض إكلي وانعمي رازقك من يِحْيِيِ الْعظم الرميم واحدٍ يعلم بما لا نعلمي ناصر جمعان آل عوض - وادي الدواسر خيراً نزل توّه على الأرض محلاه والبل تشرب من قراح الزلالي منظر يسر النفس كلٍ تمناه والبر زان وكيفة أهل الحلالي الشكر للي كون السحب واسقاه رحمه من المولى عزيز الجلالي علي الرشيد - رياض الخبراء يا زين شوف السيول وشوفة اشجاره والبل حوله وتشرب من طرف جاله يا راعي البل حذرا السيل وأسراره لوجاد سيله عسى ما هوب لك فاله السيل نعمه من الله عندك اخباره لامن تدارك حياه وجاك في خياله كم شال منهو امامه واخلف اسواره وغير عناوين فكره وازعج الحاله حمد عبدالله الوايلي - حوطة سدير سيل وربيع والعرب في سعاده الله رزقها وأصبح الكل مسرور من ربنا المعبود بخير وزياده صارت اراضينا بها السيل موفور الحمد للمعبود يرزق عباده بأرض الفخر أرض الوفاء كلها خيور وراعي الحلال الرب حقق مراده سيل وربيع وما يبي الخير ميسور محمد عبدالعزيز الخنيفر - أشيقر سفن الصحاري حصّلت ما تريده شبعت عطايا الله شقح .. ومجاهيم فالأرض سيل وعشب الله يزيده وسهلٍ خضاره شاربٍ له من الديم يالله من غيثك علينا تعيده هل المطر من فوق كنّه مرازيم تربع مطايا فيه اشهر عديده تلقى الشحم يبني عليها مراديم سعود عبدالعزيز الهزاع - نعام البر ربيعه ما ترك للحسن شيّ بين الخضار وميّ شوف المجاهيم لي ديرةٍ لا ربّعت مالها زيّ جمال أرض وجو ربعٍ محاشيم والهوا والأرض والنور والميّ كلش طبيعي دون ملتر وتعقيم جمال وش غيره تبي يا بعد حيّ ووقت السحر ياحلو طيف النسيم وفنجال مرّ .. وحلوْ مع وافي الخيّ له طعم ثاني والسماء كلها غيم سج القدم هالحين مع فجّة الظيّ ويحلى الجلوس وشوف طيب المعازيم وقبل الربيع أشرب مياهٍ من الطيّ وجال الغدير اليوم تحلى الترانيم من شاف هالمنظر يجاوب أنا حيّ بين الرسم والشوف شتّى المفاهيم سعود عائش الحربي - جدة زان جو البر في شوف الربيع وطاب لي المرواح يا عيال الحلال السيول الجارفه كثر القطيع مثلها يا ربعنا مالها مثال كل اراضينا بها عشب يفيع والعرب لاجله بدت شد الرحال يا حلو المرباع بالجو البديع مع ربوعك والسماء فيها الخيال ريان محمد الخنيفر صورة العدد السابق نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى: [email protected] ويا هلا..
