أيا إبْلٍ روت بعد العطش من مويةِ الأمزان حفظك الواحد المعبود من شر الشياطيني

صفاً كما صفت صفوف المصلين
وشربٍ وروين من حقوق السحابه
ونفود مع نو وبكاراً مزايين
في صورةٍ وحده ثلاثاً تشابه
زاكي البشري
هذي عطايا الله تورد على السيل
تسقي ظماها من قراح ازلالي
الله يسلمها عن الضلع.. والميل
يقسم لها رعيٍ بزين المفالي
اللي قنوها من خيار الرجاجيل
ربع شغاميم قروم العيالي
علي الرشيد - رياض الخبراء
عطايا الله شوفتها تشتت أعظم الأحزان
تولع في محبتها صِغِيرِينِ وْكِبيريني
ذكرها المجتبى أحمد وخلد ذكرها القرآن
وتفانى في رعايتها بإخلاصٍ مياميني
ومن زاد النظر فيها يزيد بْقلبه الإيمان
وصوفٍ في أنافتها تملّك لِبٍّ وْعيني
بها اهتمّت الدوله بلدنا زينة الأوطان
سباق للهجن سنّت وحفلٍ للمزاييني
تراث أجدادنا وانّا نحطه داخل الوجدان
إذا مال الشخص أوّل فلا له تالِي يْبيني
ولكن من يِسَيِّبْها جلب أخطار للإنسان
معاناةٍ شكى منها عباد الله منِ سْنيني
أيا إبْلٍ روت بعد العطش من مويةِ الأمزان
حفظك الواحد المعبود من شر الشياطيني
ناصر جمعان آل عوض - وادي الدواسر
البل رحمها الغيث وأخضر مفاليها
ومن زلال الميّ باقيه يرويها
يا زين شوفتها وحيران تتليها
تبي رياضٍ تالي الوسم مسقيها
سعود عائش الحربي - جدة
أنا أحمد اللي بدل العسر بالأيسار
واحيا هشيم القشع برض عنوقه
يفرح بها راعي العشاير والأبكار
واطلب عسى ربِ يتبع بسوقه
شعبانها والشغايا لملمت بحدار
من مزنةٍ سودا جزيلٍ حقوقه
وضحٍ مغاتيرٍ تسر الأنظار
وياما حلا صفه لدنة عنوقه
عبدالكريم العبيداء - حائل
طاح المطر والسيل عم البلادي
وحتى النفود الماءعليها زياده
وأهل الطروش مولفين الذوادي
صفوا كما صفت صفوف القياده
جملة مغاتير على الماء ورادي
وبالون والله ما خذين الرياده
جرد الرقاب مجردات الشدادي
فيهن مزاين كاسبات السياده
والعشب توه بالتوافيق بادي
والله يعله من صدوق هجاده
حمد عبدالله الوايلي - حوطة سدير
يا هي طبيعه جل ربٍ صنعها
بين السماء والأرض ما يبهج العين
الشمس غطاها سحاب ومنعها
لين اكتسى جو الصحاري بذا الزين
السيل من الشعبان وادٍ جمعها
ومن صافي الهملول تشرب بعارين
فوق الإبل تشكيل سحبٍ ومعها
غيم يزيل هموم من يشكي البين
ومن طق خيمه في الفياض ورفعها
تكفيه عن قصرٍ مشطب بدورين
سعود عبدالعزيز الهزاع - نعام
فارس يابن طواري يا مصورنا ياللي
مبدع في اختيارك للمكان وصفاته
منظر النوق اللي تشرب الماء وتملي
حرك إحساس فينا بسيل ربي وحلاته
صالح علي المبارك - حوطة سدير
يا مرحبا والشوق للذود طربان
يسر عينك شوف زول المطيّه
لاصرت في جواً خلا بين غدران
والطرش يشرب سيل لاوا هنيّه
راعي الحلال اليوم ياناس فرحان
أمطار واجد.. والفيافي مليّه
تبدلت له حال والرب رحمن
انزل عليه الخير بنفسٍ رضيّه
خالد ناصر المخيمر - روضة سدير
الحمد لله دارنا عمها الخير
في كل موقع نحمد الله رزقنا
السيل شوفوا يالرجال المناعير
بارض تسر القلب فيها سعدنا
ياما حلا المرباع في ديرتي غير
ولربنا المعبود حنّا حمدنا
محمد عبدالعزيز الخنيفر - أشيقر
ضلعٍ وارون من السيل ياعيس
وخوذن من الما زود قبل الجفافي
سالت ديار العز فيضٍ بلا قيس
بامر الولي غطى جميع الفيافي
من شرقها للغرب دار السناعيس
ومن الجنوب لحد ذيك السوافي
وادي «الرمه» يمشي هبوب النسانيس
من غربها يقصد بيوت وقوافي
سلم على «الروضه» ودك المتاريس
وعَشىاً على نفد الثويرات صافي
عبدالكريم النغيمشي - لوذة
يا زين شوف النوق تروي ظماها
تشرح القلب وتسعده من صوره
حظ من هي عنده هديَّه ولاَّ شراها
أنا على حب النوق نفسي مجبوره
صلاح بن ظافر - خميس مشيط
اليوم زان الجو مع كثرة السيل
شوفوا الإبل وردوا عليه بسعاده
والكل يفرح يالرجال الحلاحيل
والعبد في خير وتحقق مراده
فارس تحرّك مابقي الا المعاميل
والطيب باهل الطيب معروف عاده
ريان محمد الخنيفر
نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
صورة العدد السابق