عينه على المضمار والعزم معقود يبي منار المجد يمسك سنامه

على وقت الصباح وذّرة الاشراق
وتجهيز الركايب والمشي برفوق
يعيد الماضي اللي راح فيه افراق
سقى الله زمانٍ فيه الوسايل نوق
تعلم يا بطل واركب ارفع الاعناق
خلك كارب شدادك واثق وموثوق
لعلك تقطع الفرجه بدون سباق
توكل عليه وتمشى بدون العوق
حمد عبدالله الوايلي - حوطة سدير
الهجن ذكراها بعصر الجدودي
يا مالها صولات ولابه مثيله
وقتٍ مضى معروف له وجودي
ما مثلها بالصبر دايم أصيله
فيها الوفاء والعزم بليا حدودي
مشهورة بقطع الفيافي الطويله
محمد عبدالعزيز الخنيفر - أشيقر
الظاهر ان ذي من ركاب النجارين
واضح على الهجّان لبسه جنوبي
مطقمٍ بالازرق مع لجام البعارين
بكوتٍ يدفي عن براد الهبوبي
هجنٍ مواطيهن خفاف وعجلين
طوال الخطاوي مقربات الدروبي
سفن الصحاري عزوتك في الميادين
قبل المواتر للنقل والركوبي
سعود عبدالعزيز الهزاع - نعام
حيّ الصبي اللي ورث فعلت جدود
على المطيّه رابطٍ له إعمامه
عينه على المضمار والعزم معقود
يبي منار المجد يمسك سنامه
ويرد الأول يرفع الكاس ويفود
يحقق مرام اللي سعوا في مرامه
له الطموح اللي مع الناس مفقود
يشوش راسه للفخر يا خذ وسامه
خالد ناصر المخيمر - روضة سدير
ياما حلى الهجن منتلّه
كلٍ على حظ راعيها
وبالسّبق تلبس لها حلّه
حافز على الفوز يعطيها
ولسّابقة جهزوا دلّه
يستاهل الكاس راعيها
والحمرا النادره والله
أثمانها الغالية فيها
طيبة مزايا عطايا الله
من أجلها الناس تبغيها
وللهجن أدوار منجلّه
الأمس واليوم نغليها
سعود عائش الحربي - جدة
هذا السباق اللي له العين تشتاق
فيه الجمال اللي لها قدر وجلال
يا زينها في تختخٍ راعد وبرّاق
هي والله اللي دايمٍ كسب وآمال
سطام الهذال
محلا الجمال الطيّبه زين شوفه
نحبها بالحيل ما أكبر غلاها
يا زينها فيها الوفاء ومعروفه
ماهي خفيه بينه في وفاها
والشعر يعجز دايمٍ في وصوفه
كم من دروبٍ بالصحاري تطاها
ريان محمد الخنيفر
هذا الولد فوق الجمل ماسك خطام
يريد يحقق له وسام البطوله
في نظرته آمال وللمجد مقدّام
يالله عساه الفوز ربي ينوله
بشائر القحطاني - الرياض
نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
صورة العدد (عدسة / لمياء الرميح)
Your browser does not support the video tag.