الهودج اللي راح وقته وشفناه شالوا عليه أهل الركايب زماني

ما روث من ماضي حياة بدويّه
يوم البدو ما بين نازل ورحّال
شدّت رسنها لا تهج المطيّه
قساوة الصحراء خذت منه الافعال
تمشي بصحراء في رياضٍ خليّه
تقطع مسافتها ركوبٍ على جمال
الخوف معها ما يشكل قضيه
رغم الوحوش الكاسره واسعة بال
سعود بن عبدالعزيز الهزاع - نعام
الهودج اللي راح وقته وشفناه
شالوا عليه أهل الركايب زماني
واليوم صوره ذكرتني معاناه
ناسٍ لهم بين الضلوع المحاني
ذكرى عريقه يوم كسبه بيمناه
يا بنت جيلك راح باقي المكاني
جيلٍ رحل يا زين طيّبه ومجناه
اكمل مسيره رغم ما هو يعاني
حمد عبدالله الوايلي - حوطة سدير
اللي على الناقة لنا فيه تفكير
الواجب الهودج يجي في مكانه
لكن اشوف الطاولة فوقه تصير
لاهيب لافطنة ولاهي ذهانة
ما ظن ناقتكم على الوضع بتسير
تركيبكم للعفش فيه استهانة
علي الرشيد - رياض الخبراء
ذكرى السنين الماضية ذيك الايام
من يوم شفت العفش فوق البعيري
ذكرت بدوٍ سالف أعوام .. وأعوام
تشد وترحل في مشاهد مثيري
تسعى ورى الامطار من عام لاعام
ترعى الحلال وكسب مالٍ كثيري
خالد ناصر المخيمر - روضة سدير
يا بنت ياللي وقفت بالمسيري
كله لاجل ترتاح .. تبدا مسيره
قدامها المشوار ماهو قصيري
يا عل دروبه يالرفاقه يسيره
يالله عسى الميقاف ماهو عسيري
ويحميك ربي من شرورن خطيره
في موقعٍ يا ناس والله خطيري
يا عل تاصل يا عرب للعشيره
محمد عبدالعزيز الخنيفر - أشيقر
ولى زمان كانوا البدو رحّال
ومن اين ماطاح الحيا يتبعونه
من فوق عجلاتٍ يشيلن الاحمال
والهودج اللي فوقهن يرفعونه
واليوم بأمر الله تبدلنا الاحوال
اللي سكنوا بيت الشَّعر ما يبونه
سووا لهم بالمدن مسكن ومقيال
متريحين وربهم يشكرونه
زبن مقبل العنزي - بريدة
ياما ركبنا ظهور زملن لنا فات
مع الصحارى بين شدّه ومنزال
رغم السنين الماضيه والمشقات
دور السفينة بين حل وترحال
خليف فهيد الحربي - الرياض
اتعبت عمري واتعبني المشاوير
بين النفد .. بين الدروب الطويلات
يا ناقتي نرتاح يالله عسى خير
وانا اتهيّض وابتدي بدع الابيات
ثمن اسولف مع حسين التعابير
واقطع فيافي به كثير المسافات
انتي الغلا كله ولامنك تقصير
يا مضرب الامثال ماهو دعايات
ريان محمد الخنيفر
نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
ويا هلا..
صورة العدد السابق
Your browser does not support the video tag.