يا ما حلا صفر الدلال المهاديف بأطراف نار يستثيرك سناها

بيت وصدى

كتبه للصفحة الشاعر حاتم الشاهر الغريري من الشنان ويقول:
يا ما حلا صفر الدلال المهاديف
باطراف نار يستثيرك سناها
وقد كان صدى البيت من الشعراء:
في خايع نبته زماليق ومريف
ريحة عطوره فايحه في سماها
عوده خضر ماجاه نوع من الهيف
قد علها وسم السحاب ورواها
وقته ربيع وما بعد اقبل الصيف
يطرب هوى نفسك ويروي شفاها
جويريحك ماتخيل على الكيف
يكفيك لاشميت نسمة هواها
خوة نشاما تكرم الجاروالضيف
تعطي وتكرم يوم ربي عطاها
حمد عبدالله الوايلي - حوطة سدير
يا محلا شوف السحاب المراديف
اللي على العارض تصب ماها
النار يا حاتم شبت على الكيف
ودلال صفر (ن) غالي (ن) مشتراها
فنجالها الاول لمكرم الضيف
اللي يقدم للنشامى عشاها
ودارت فناجيل ودارت سواليف
والدار تحمى في رجال تحماها
شجعان بن سعود المقاطي - الرياض
فيما مضى واليوم صار الحطب ليف
ارض الحطب شيخ المكارم حماها
من يحتطب تخريب يلحقهم الحيف
لو يخطي المخطي يعاقب علاها
يا حاتم اسمك مكرم الجار والضيف
تفخر به اجموع العرب من وفاها
عسى السحاب للي مزونه مراديف
يسقي ديارن بعد القيض ماها
بدر الحزيمي - الرياض
كيف اتهنا بالسمر والسواليف
والحرب شفها غيمت في سماها
حروب وضروب وتاتي مقاذيف
ودوت براميل الوغى في قراها
تحالفوا يا اهل الشيم والمعاريف
حتى جموع الشر تموت بخزاها
واذا تعدينا الكدر والصواديف
زانت لنا الدله ورشفات ماها
علي بن سعد بن هتلان - الرياض
في موقعن فيه القصص والسواليف
في ديرتي يا زين نسمة هواها
بأرض(ن) والسعد فيه لا شيف
مع الرفاقة والهنا في لقاها
ومحلا الصحاري والسحايب مراديف
والسيل في الشعبان ربي ملاها
لا هو بواشنطن ولا هو بجنيف
في مملكتنا طيب الله ثراها
محمد عبدالعزيز الخنيفر
في مجلس ما يدخله كل تزيف
ما غير خلان تزايد غلاها
راعيه يفرح كل ما شرف الضيف
جمعة ربوع تعجبك في نباها
والعود الازرق حاضر يكمل الكيف
شيء يسر النفس يطرد غثاها
ويكمّل المجلس بزين السواليف
نوادر تعجبك في محتواها
علي رشيد الرشيد - رياض الخبراء
يا محلا خوت رجالن عواريف
خطوى النشامى اللي يسرك لقاها
برضن قفر من وسمها لاأخرالصيف
قفر بعد راع الغنم ما وطاها
فيها ام سالم بس تلعب غطاريف
هذا هواها قلت هذا هواها
يالله عسى كل الوطن أمن وريف
ذي مملكتنا بس نعلن غلاها
حب الوطن له مسكنن بالسراجيف
من حقها قلت اللك نحمي احماها
سعد صنهات السهلي - الدرعية
يطرب لها اللي عارف قيمة الكيف
حب اليمن بغالي الثمن مشتراها
بهارها ليجا مصفى مع الليف
من به صداع بجبهته هو دواها
اللي حكرها للمعاميل حريف
ومعه رجال عالي مستواها
بها يزين الجو و تحلى السواليف
ببيوت شعر شاطر اللي بناها
سعود عبدالعزيز الهزاع - نعام
يزين جوي مع رجال مواليف
ناس نشاما حقق الله رجاها
مع الرفاقة والسوالف على الكيف
يا ماحسن الجمعات واللي مشاها
جمعة وفا من دون بعض التكاليف
يا حيث بعض الناس فيها تباها
عند الرجال الطيبين التواصيف
وناس مشوا بالطيب تلقى جزاها
ريان محمد الخنيفر
بيت الاسبوع
يكتبه الشاعر صالح مطير الحمدان من حايل حول التصافي والالفة والمحبة ويقول:
العمر ما يسوى الخلافات ياخوان
ما احلى التصافي والنقا والسماحه
نستقبل صدى هذا البيت بأربعة أبيات حتى يوم الاربعاء القادم ويفضل الإرسال عبر الإيميل:
rb-khozama@alriyadh.com
أو على الفاكس 4871070/ 011