البر زان وصار وقت المطاليع واغنم شبابك قبل وقت المشيبي

كتب بيت الأسبوع للصفحة الشاعر علي برجس الجعفري حول طلعات البر والاستمتاع بهذه الأجواء الجميلة والربيع البديع ويقول البيت:
البر زان وصار وقت المطاليع
واغنم شبابك قبل وقت المشيبي
وكان صدى البيت من الشعراء:
حِسْن الربيع او شَوْفْ مِن بِهْ مُوَالِيْعْ
بالجَوْ.. وزهوره وروْضٍ خصيبي
سَلّْ النظر ما بين روض او ينابيع
قَبْلْ القِدَمْ سَجِّته تصبح صعيبي
وَلاَ ضاقْ صدركْ وَسِّعِه بالمِطَاليع
تشوف الربيع اللي بحسنه عجيبي
وِانْسَا عشان الْبَرْ بعْض المطاميع
وَاشْرِك معك مِن كان عندك حبيبي
سعود عايش الحربي - جدة
سجْع الحمايم والصدى له تراجيع
والزهر ينفح في ثراها الرحيبي
ودلة القهوة رحيق المجاميع
كم من فتى حلو السوالف نجيبي
يا زين بَر المملكة والمرابيع
طبّ الفؤاد المستهام الكئيبي
زياد المنيفي
واختر من الرفقة رجال مسانيع
ناس نهارك مع نباهم يطيبي
واجعل لنفسك مع عيالك مشاريع
بين الرياض ابوسط جو رحيبي
لاتقرب دروب خطرها مفاجيع
ترى نتيجتها عذاب ونحيبي
علي الرشيد - رياض الخبراء
القمري غرد في غصون مفاريع
جر اللحن وجروح قلبك تطيبي
يا زينه المكشات هذي الاسابيع
وناسة الخاطر ولمة قريبي
وجهتك يممها لنبت المرابيع
شوف الفياض قبل قيض اللهيبي
فيصل سعود صقر - الرياض
يازين شوف العشب لا شفته يفيع
شوفه يسر القلب وجوي يطيبي
وتلقى الزبيدي بوسط خده مصاليع
الخير واجد بكل وادي وشعيبي
ارضه زهور تعجبك به تناويع
ذي قدرة الخالق ولاهو غريبي
محمد بن عبدالعزيز الخنيفر - أشيقر
الارض خضراء به حلال مشابيع
من فضل رب الكون لخلقه يجيبي
وشفت العرب تمشي بوسطه مجاميع
هذا اخو وهذا قريب وصحيبي
وتلقى السيول الوافره كالينابيع
بامر الولي من يطلبه ما يخيبي
ريان بن محمد الخنيفر - أشيقر
مالوم ناسٍ بالبراري مواليع
عزّ الله إِنْها للعلايل طبيبي
يا صاحبي إِنْ كانِ للشُّورِ بِتْطِيع
هيّا بِنا نكشت بِبَرٍّ رحِيبي
في روضةٍ من زارها همّهِ يْضيع
تنسيه روتين الحياة الرّتِيبي
أجّل علاقاتك وكلّ المواضيع
واجعل لنفسك فِ الأناسه نصيبي
ناصر جمعان آل عوض - وادي الدواسر
البر زان وزان وقت المرابيع
وعند العرب كثر اللبن والحليبي
وبه الكما هو والزبيدي مفاقيع
ماجود في وسط السهل والشعيبي
هيا بنا قبل يجون الطماميع
الي بعيد الدار واللي قريبي
زبن مقبل العنزي - بريدة
بيت الأسبوع
كتبه للصفحة الشاعر زياد المنيفي حول موضوع الشعر، وإن المحتوى هو الأهم وليس النظم الخالي من الصور والإبداع ويقول البيت:
الشعر صورة والإطار القوافي
ما هو بحسْن الوزن والروح معلول
نستقبل صدى هذا البيت بثلاثة أبيات تدور حول هذا الموضوع، وخلال أربعة أيام من نشر البيت.
على الإيميل:
rb-khozama@alriyadh.com