بيت وصدى

كان بيت الأسبوع الماضي للشاعر صباح الظفيري من الرياض ويقول:
حل الربيع وزان جو المطاليع
والرجل يا ضايق مع البر سجها
وكان صدى البيت من الشعراء:
يا ضايق النهج للخلا والمرابيع
وفرّج همومك والسباريت دجها
مهاملٍ فيها الزبيدي مصاليع
ماطبّها أهل البوش والا نعجها
بس الحباري والحجل والجرابيع
وصوت أم سالم يوم تبدي غنجها
ناصر موسى الحزاب - البويردة
خل الديار وخل كل المشاريع
والنفس ريحها وشفها وعطها
عطها هواها مع رجالٍ مواليع
شف الزهر متخالط مع نفلها
الأرض زينه والفيافي مرابيع
مراتع خضراء وربي وسمها
حمد عبدالله الوايلي - حوطة سدير
هذا زمان البر وقت المرابيع
والناس هذا وقتها في طربها
تحلى الصحاري بالرجال المجاميع
لا حلوا الضيفان تلقى طلبها
والأرض تزهو بالزهور المناويع
والشاذليه يهتني من شربها
محمد عبدالعزيز الخنيفر - اشيقر
لو قيل لاتطلع إلى البر ما طيع
ما طيع لو كثرت عليّه حججها
امشي مع اللي يرغبون المرابيع
امشي مع ديار وساع فججها
اناى بدوي بالبر لا اشري ولا ابيع
ودنياك لا ضاقت على الله فرجها
زبن مقبل العنزي - بريدة
ترتاح في برٍ زهوره تناويع
كن الفرنسي ماخذ العطر منها
أرضٍ من الوسمي وفقعه مصاريع
ما داجها ذودٍ بخفه دعسها
بساطٍ خضر يشبه المشتل مشاريع
يا رب من الخيرات بارك وزدها
سعود عبدالعزيز الهزاع – نعام
خيّم على جال الفياض الملاميع
وبهّر دلالك بالعويدي ورجها
تنسى الهموم الكايدات المواجيع
لو هي عويصه طبها في مرجها
وأكشت مع اللي بالبيادي مواليع
عشاقها في كل وقت وحنجها
علي الزولاني الفيفي - بيشة
أرض تشجع زايره بزين تشجيع
بأزهارها تعجبك وما اكثر عربها
عشب يسر القلب فيه التناويع
ومن زارها مرة دايم رغبها
فيه أم سالم تعجبك بالتساجيع
بوسط الربيع اليوم ما ازين طربها
ريان محمد الخنيفر – الرياض
أنا أشهد ان البر طب المواجيع
يطفي لضا نارٍ بجوفي وهجها
أهدم مشاريع وأعمر مشاريع
بعيد عن ضوضا النطاق وهمجها
في ديرةٍ لصيد فيها تناويع
ما تنعرف برانها من درجها
مبارك محمد آل معمر
بيت الأسبوع
اقترحنا أن يكون موضوع البيت اختياريا للشعراء بطرح البيت وموضوعه وبيت هذا الأسبوع للشاعر عبيد عبدالله القحطان من الجوف ويقول:
ياما حلا .. ياما حلا شبّة النار
في خايعٍ توّه مع الصبح ممطور
نستقبل صدى هذا البيت بثلاثة أبيات فقط تدور حول هذا الموضوع ويفضل الإرسال عبر الإيميل:
rb-khozama@alriyadh.com
أو على الفاكس 4871070/ 011
ونرحب بطرح بيت الأسبوع وموضوعه مفتوح للشعراء.