صورة تجلاّ الفن فيها والإحساس تبرز أصيل تراثنا مع جميله

مجلس منظّم جاهزٍ للعزايم
شفت الدلال مصوطرة وسط الاوجار
والبن بالمحماس والحظ قايم
مفلول احجاجه إليا جوه زوّار
من حوله المنفاخ والنجر دايم
في صوته الرنّان رمزاً للاخيار
علي الرشيد - رياض الخبراء
أحمس وبرّد واطحن البن يا ذيب
وركّب دلالك يا نديمي على النّار
وان فاحت الدلّة كما ريحة الطيب
لقّم على الرسلان هيلٍ .. ومسمار
وحطه على جمر الغظا حاشك العيب
لين تعقد ويجيب ريحه هل الكار
وإليا اجتمع حولك رجالٍ مناجيب
سقها عساك تساق يم النّبي جار
وقدّم معه يا خوي تمرٍ من الصيب
يقطر مجروش جنب زبدٍ مع مضار
عبدالكريم النغيمشي - لوذة
يا خليف شب النّار وادن المعاميل
واضبط لنا يا خليف ما يقعد الراس
نبي لنا فنجال مضبوط من هيل
من دلّة الرسلان ويطير اعماس
ودارت سوالف المزح .. والتعاليل
فيها الأناسه كلها ذوق .. وإحساس
في جو كايف يا عرب ناقصه سيل
الله يجيب الخير للناس لاباس
من مدلهم ساريٍ تالي الليل
وتباشروا بالخير وللخير عسّاس
خليف فهيد الحربي - الرياض
سَلْمت نْفوسٍ على العزّه ربَت
كيفها من راسها تهوى الحياه
بالذي قدر إلهي قد رضت
بالقناعه حسَّتِ بْطعم الغناه
عمرها في جمع مالٍ ما أهدرت
تدركِ إن كلٍّ بيترك ما اقتناه
إن عرضها ما يكدّر طنشت
تصفح وْتنسى ولا تتبع غُواه
صورةٍ منها عيوني دَمَّعَت
رجّعَت ماضٍ تولى لهْ حلاه
ناصر جمعان آل عوض - وادي الدواسر
يا مرحبا بضيوفنا لا لفونا
نحبهم بالحيل بالقلب غالين
نزهب القهوه إليا شرفونا
اللي يجينا كلنا له محيين
واللي يشرفنا منزله بالعيونا
وترى القهاوي للرجال العزيزين
محمد عبدالعزيز الخنيفر - أشيقر
مفاخ ودلالٍ مبرّد .. ومحماس
في مجلسٍ متكاملٍ في معاميله
صورة تجلاّ الفن فيها والإحساس
تبرز أصيل تراثنا مع جميله
رمز الضيافه قهوةٍ تقعد الرأس
عِشقها بالأرض يندر مثيله
بريّةٍ ما جابها غالب النّاس
عميلها وصّى عليها عميله
تحمس على نارٍ ببصرٍ ومقياس
حوفة صبيٍ نهج جدّه سِبيله
يعنّى لها اللي صكّه الراس بعماس
بالرّجْل ما دوّر تكاسي تشيله
لدلّةٍ بِرقيها يشبه الماس
ما ربّها الربّاب .. ولاّ زميله
سعود عائش الحربي - جدة
المجلس اللي جوّه اليوم جوين
فيه الكرم والدار صارت مرابيع
ويجيه ناسٍ من رجالٍ ميامين
واللي يشب النّار شبّة مواليع
البن الاخضر جيّدٍ من مضامين
بنٍ من الخولان مصدر منابيع
أركه على حلّه وقلّبه في حين
لامن تلوّن بالشقاره مساريع
دقّه بنجراللي خفوقه مرانين
وعليك باقي زلته والمشاريع
حمد عبدالله الوايلي - حوطة سدير
دلّه ومحماسه .. مبرّد ووجار
وحطبٍ سمر من بينه النّار حيّه
ادلال مصفوفه تقل شغل نجار
يتعب لهن راعي الكرم والحميّه
هذي حلاة البر في وسط مشجار
والأمطار تمطر في صباح وعشيّه
خالد ناصر المخيمر - روضة سدير
احمس لنا البن بالمحماس
لا جو ربوعك نقهويهم
من قهوةٍ تعجب الجلاس
نقول الله يحييهم
ريان محمد الخنيفر
محماسة البن لها المعيلي يحوف
مجلسك عامر عسى عمرك يدوم
صبغ الدخن خلا الجدايد بها سمول
خلطن حطبها جزايلها مع اجروم
صفر المباهير غرنوقة الزول
والنجر يلعي يدعي تعالوا قدوم
حبها من اليمن عسى عسره يزول
ويستر على الحزم والعزم اللزوم
عبدالكريم العبيداء
يازين شوف دلال محماس ووجار
صوره فريده تبهج القلب والعين
هذي يا ماجد صورةٍ تلفت أنظار
فيها تراث أجدادنا أوّل والحين
بشائر القحطاني - الرياض
نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
صورة العدد السابق