صوت الصورة

شفت الجمل حولك ومشدود بشداد
والدله الصفراء على الجمر والجال
البن الأشقر فاح والهيل بزياد
مشغول بالدله وشاغلك جوال
مدري طعامك وينه اليوم والزاد
زيك جنوبي وأنت يا طيّب الفال
عبدالمحسن محمد المحيسن - رياض الخبراء
ياما حلا جوك إلى صرت مشتاق
والبال سايح ما يكدرك مخلوق
في جرهد والوقت مع حد الاشراق
والنار مشعومه ولافيه منطوق
دنت معاميلك لها الكيف ينذاق
لازانت الطبخه تساوت على الذوق
دنه وزله واشربه كل مالااق
وحط الفواله واجب حيل مرموق
جلسه لها في ماكر العز معشاق
يوم المسافه ماتجي غير بالنوق
حمد عبدالله الوايلي - حوطة سدير
روّق وخدّر كاستك ودلالك
في صحصحٍ جاز المقيل بوسطه
كرّم غريب الدار واكرم حالك
على البساطه دون خطٍ وخطه
وادع الصديق ولابتك وعيالك
وان ضاق صدرك كل رجمن نطه
عسى السعاده ظلها يبرالك
والهم في بير الليالي قطه
سعيّد حمدان العسوج - حائل
يضبّط له الفنجال ويكيّف الراس
في موقع ما احلاه بين الطعاميس
نرهم على ربع يحبون الاوناس
الكل منهم للغلا يرخي الكيس
وأيضا الرحول منوخه ما بها باس
ضبّط حزامه ما نحته الهواجيس
علي رشيد الرشيد - رياض الخبراء
اصف الدلال وكلم الربع جوال
ووصف لهم بالمتر لاهم يتيهون
واحكر لهم شاهي منعنش بفنجال
وجمريةٍ مع صافي الدهن مكنون
ذي منوة المفتون بالبر يا خال
جنب النياق وبين ربعٍ يمونون
بس البلا صدرك به الموت يختال
ياخوفتي من جاك ديور.. يهجون
عبد الكريم النغيمشي - لوذة
يسرى بها جوال ويمنى بها بريق
والنفس مرتاحه ولا به همومي
في وسط خايع ما وطوه المخاليق
غير أم سالم بالجناحين تومي
يزهم على ذيك الرجال المطاليق
يا مرحبا ترحيبةٍ يا القرومي
سلم الرجال مطوعين المطافيق
اللي لهم في محفل الجد يومي
خالد ناصر المخيمر - روضة سدير
يا ناقتي صبرك ترى الراس خرمان
يحتاج له فنجال بنٍ على الكيف
ومقدر على المسيار بالحيل شفقان
تراي أحب الكيف لو به تكاليف
وانا انتظر صحبي وربعي والاخوان
لامن لفوني كم تزين السواليف
يا ناقتي فيك المناظر لها شان
انتي بقلبي مع حسين التواصيف
محمد عبد العزيز الخنيفر - أشيقر
بين الصحاري وتقنيات الحضاره
تجمعت في واحدٍ شب له ضو
يكلم بجوال عن احوال داره
والكف الايمن يلقم البن للتو
مطيته ماتختلف عن مساره
ضمن الركاب الطيبه لين عدو
وقت الهجيج تاهله لصداره
وقت التنقل تقطع البيد والدو
سعود عبدالعزيز الهزاع - نعام
سلام الله على اللي جهز الشاهي مع الدله
ونوّخ له ذلولٍ يجذب الهجان ممشاها
يغني من قصيد الطيب لحنن يبري العله
تراث سطر التاريخ للاحفاد ذكراها
مجهز غوري الشاهي ويزهم له نديم له
حياة الهجن والهجان يكثر من تمناها
هيفاء بنت طلال التميمي - سدير
يزين لي المجلاس مع شبة النار
جالس لحالي وانتظر من يجيني
واجهز الدلة منشان الاخيار
لا جو الرفاقة تو جوّي يزيني
واكلم المحبوب مع نظم الاشعار
والحب للغالي يزيد الحنيني
وذي ناقتي تقطع مسافات الأسفار
فيها من الذكرى بذيك السنيني
ريان محمد الخنيفر - الرياض
نرحب بمشاركاتكم الشعرية وما تلتقطه عدساتكم من الصور الهادفة والطريفة
على إيميل الخزامى:
rb-khozama@alriyadh.com
أو الفاكس رقم: 0114871070
ويا هلا..
صورة العدد السابق