صوت الصورة

ياما حلا مجلاس راع النواميس
مسوي الفنجال والذود يرعن
بأرضٍ قفر تجلى كثير الهواجيس
اللي على بال المشقين يطرن
مدّت نظر تسوى لبعض المجاليس
وسجّة قدم فيها لمن يقصده فن
محمد عبيدالله العنزي
ياما حلا الجلسه على شبّة النّار
في صيهدٍ والجو صافي وقرقوف
عند الدلال اللي بها الكيف قد فار
والشاي خادر والشفق توّ مشيوف
معك العيال اللي من الربع مختار
رفقة ولف من دون أبله وملقوف
ذي جلسةٍ تسوى ملايين دينار
ما تباع لو سعره ملايين وألوف
عبدالكريم النغيمشي - لودة
يا موسّعٍ صدرك على صالي النّار
في خبةٍ وسط النفود المراميل
جالس لحالك تحتري ساير الجار
حيث الدّلال مبهراتٍ على الكيل
يالله عسى جوّك تجي فيه الأمطار
من أول الوسمي وهو حاير السيل
تشوف عشبه مع تلاوين الأزهار
يرتع حلاله مايبي الحط والشيل
حمد عبدالله الوايلي - حوطة سدير
وسط الفلا والبل ترعى مفاليه
عينٍ على الدّله .. وعينٍ على النّار
حط الوجار الزين عينه تراعيه
ترى الغداء محسوب للضيف والجار
عبدالمحسن محمد المحيسن - رياض الخبراء
يالله عسى المطر يسقيه
جواً به البوش رتاعي
وراعيه جالس يعاين فيه
يا عنك ما يتعب الراعي
والكيف قدمه يسويه
بريةٍ تبري الاوجاعي
ومن جاه هلّا يقهويه
سلم العرب زين ماضاعي
شجعان المقاطي - الرياض
للبر وقفة يا هل الفكر والشور
ورفقة خيار الناس تازن ذهبها
الرمث يقدح والغضى فج بالنّور
ولو ينطفي عوّد بقلبي لهبها
والدّلة الصفرا .. وبرّاد محكور
وعزف الربابة وأنطرب من طربها
لاجيت ابا أوصف رحلة البر مقدور
لاهي كما لندن.. وباريس.. وأبها
محمد وصل الله السويهري - مكة المكرمة
شبيت ناري وأنا مرتاح
يوم شفت البعاريني
لا شك بالي غدا منساح
ومعي زهابٍ يكفيني
وش عاد لو كل شيٍ راح
رب البشر يأخذ ويعطيني
سلطان أحمد العضيدان- الغاط
لا ضاق صدرك وزادت همومك هموم
والناس كلٍ منشغل في حياته
جهّز لك العزبة وخل الزعل واللوم
ووجّه على برٍ يشوقك فلاته
أطلق خيالك بالفضاء وودع النوم
وأشكر ولي العرش .. أطلب جناته
خالد ناصر المخيمر - روضة سدير
بدا يزين الجو للي يبي البر
الطقس وضعه مايلٍ للبروده
ليجا معك رسلان .. وبنٍ مبهّر
والذاري اللي سد حرّاق عوده
في ماقعٍ نبته تحسبه معطّر
ماطبّه الراعي بقطعان ذوده
مثل الذي قاعد وكنه يناظر
تقبل له الضيفان من طيب جوده
سعود عبدالعزيز الهزاع – نعام
رحلت للصحراء لقيت الهوا الزين
شبيت ناري وانتظر بعض الأصحاب
يزين جوّي مع رجال الميامين
ويرتاح بالي مع طويلين الأشناب
ومن جا مسيّر منزله داخل العين
أهلاً هلا يا مرحبا بكل الأحباب
مكانكم بالقلب .. بالحيل غالين
وبوجودكم يا ربعنا الجوّ لي طاب
محمد عبدالعزيز الخنيفر - أشيقر
فنجال كيفٍ يشد الراس
وأمهيّله توّ مزلوله
وبريق شاهي مع المجلاس
في روضة البر منزوله
والضّو تمتع لها إحساس
ذبيحته توّ مشيوله
عبدالكريم عبدالرحمن السلَّوم - القرائن
شبّ نارك يا رفيق الخير شبّه
والنشامى يا أبن عمّي قادمين
والقهاوي دنّها لغالي نحبّه
يا هلا .. يا مرحبا بالطيّبين
وللمسيّر قرّب القهوة وصبّه
ومن لفانا يا هلا جوّي يزين
جلسةٍ يا زينها .. وبلا مسبّه
كلها حُبَّ .. ووفاء للخيّرين
ريان محمد الخنيفر
مع رضا الرحمن يا طيب ساعه
جلسةٍ بالبيد .. والنّار مشتبّه
بالبيد عن تلويث الأجوا مناعه
ساس الجدود مرسخين المحبّه
سجةٍ في وسط أرضٍ مشاعه
ولا جلوسٍ خلف سورٍ وظبّه
وطير الخلا شوفه يزين وسماعه
وغربيةٍ يحلا بقلبي مهبّه
سعود عائش الحربي – جدة
نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
أو الفاكس رقم: 0114871070 ويا هلا..
صورة العدد السابق