صوت الصورة

خدّر لنا الشاهي وعطنا لنا الكاس
وخلّه على كيفك .. وزوّد حلاته
لا باس لو تأخذ معك كوب لا باس
وسط الطريق اخذه وهذي طراته
دروب البراري عامرة كلها ناس
كلٍ يدوّر عيشته في حياته
عثمان إبراهيم الرشيد - الرياض
الرزق مطلب بلا شكه
مير النُّظم تمنع الفوضه
وبلا تراخيص بالسكه
فواكه .. وشاي معروضه
واللي عرض يدعوا الفكه
من إجراءات مفروضه
سعود عائش الحربي – القاهرة
ياما حلا حكرت البرّاد
لا صرت تعبنٍ وخرماني
الجمر في منقده وقّاد
برّاد زاهب معه ثاني
ترى الكرم عادة الأجواد
والكل عايش باماني
عبدالكريم عبدالرحمن السلّوم – القرائن
كل جمعه ف الجريده منظرٍ يعجبنا
صفحة خزامى الصحاري والشعر والصوره
في عددها اليوم صوره يا بكر تجذبنا
صورةٍ من شكل بوسطها منشوره
سعود مطرب العتيبي - الدوادمي
شاهي وفواكه ما تبي اليوم موجود
والرزق عند الله للي سعى فيه
بسيارته باسط سعودي مع هنود
كلٍ يبيع .. ولازم إنا نحييه
وبعض الخطأ لا صار وراد ومشهود
يسبب الزحمات وأخطار يجنيه
محمد عبدالعزيز الخنيفر - أشيقر
للناس فيما يعشقونه مذاهب
لولا اختلاف الذوق محدٍ شرى وباع
أحدٍ يحب الشاي سكر مناسب
واحدٍ غرامه شاي عِطِّر بنعناع
واحدٍ لشاهي الجمر هاوي وراغب
حسب المزاج الشاي له عدِّة أنواع
ياللي تشرط كون مكتب وراتب
كمٍّ ثريٍّ ابتدا المجد من قاع
يا من ببيع الشاي تجني المكاسب
الله يوفق كل شاري .. وبيّاع
ناصر جمعان آل عوض - وادي الدواسر
شريطيةٍ بالسوق يا صاحي
احذر تغشك وأفهم القصدي
كلٍ بوسط السوق صيّاحي
يقول قرّب عندي الأصلي
هذا يبيعك خمس تفاحي
احذر يصيدك يا بعد كبدي
بريقين فيها الشاي قد فاحي
فوق الفحم بالمنقد المصدي
يصب لك ف الكاس مرتاحي
ياخذ فلوسك وأنت ما تدري
عبدالعزيز الصالح - القصب
ناسٍ تبيع وفعلها اليوم مخطور
بالأرصفة يا شينها من طبيعه
هذا الفعل ما هو بطيّب ومحظور
حول الشوارع كيف حنّا نطيعه
هذي رسالة وافهموا العلم والشور
نبعد عن الأخطار بأرضٍ وسيعه
ريان محمد الخنيفر – الرياض
وقف وطالع يا بطل واشرب الكوب
على الطريق اللي يودي على وين
قالوا تفضل اشرب الشاي محسوب
شاهي على كيفك وكيف المحبين
في منقدٍ فيه الجمر حار مشبوب
جاهز ولا يبغى من الوقت ثنتين
حمد عبدالله الوايلي - حوطة سدير
عزّالله إنّه يا الربع شهم وشجاع
يدوّر العيشه .. وهذي سواته
ياما حلا لا صار شاهي بنعناع
يعجبك زينه .. زايدٍ به حلاته
خالد ناصر المخيمر - روضة سدير
ترزّق الله بمدخلٍ للصحاري
شاهي جمر بفلوس من جا يبي كوب
وياللي تبي الرمان لي جيت شاري
اشتر من اللي بموتره لابسٍ ثوب
يا رب زدهم من الدخل والمصاري
تشجيع راع الدار فرضٍ ومطلوب
سعود عبدالعزيز الهزاع - نعام
ثن البريق وصب للربع بطياس
وابغث لهم يا ذيب من ماء الفناجيل
ذي شلةٍ تشرب بلا قيد .. وقياس
بزرانهم .. وعيالهم .. والرجاجيل
لاجاك واحدهم بمخباته الكاس
شفقٍ على البرقان يشرب بتعجيل
يدوخ راع الكيف ويصاب بعماس
ولو خلّص الشاهي تضيع المحاصيل
عبدالكريم النغيمشي - لوذة
العمل ماهو عيب واجب ومطلوب
أمرٍ من الوالي عزيز الجلال
أجر ونشاط وصحه ومال مكسوب
وحفظٍ من العاله وذل السؤال
حرفه يعاش بها ولا مال مسلوب
وكلٍ مبارك والمكاسب حلال
عاطل بلا شغل مهانٍ ومسبوب
كادح موقر في عيون الرجال
عبداللطيف الحُمَيَّانِي - عنيزة
نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
أو الفاكس رقم: 0114871070
ويا هلا..
صورة العدد السابق