شبيت ناري في البرار الخليه لعل تطفي في فؤادي لواهيب ناقصني إدلالٍ بها الشاذليه وألبس لباس مدلهين الأصاحيب سرور بن محمد بن حنيان - المجمعة إرك الدلال الصفر.. وإرك المعاميل والحق على نار الحطب لا تموتي توك صغير ما تحب الغرابيل وألبس جديد اللبس فروه.. وكوتي عبدالمحسن بن محمد المحيسن يا حي هذا الشوف يا شبة النار قبل الفجر .. وضحي.. وإلا عشيّه في خايعٍ مرويه همّال الأمطار الأرض توّه من مطرها نديّه فهد بن عقيل الطويان - بريدة ياللي حداك البرد في شبة النار حولك مشاجيراً تزايد خطرها أحذر يشوقك لمعة الجمر لاطار تقضي على الغابات باصغر شررها سعد الحماد - روضة سدير ياحلو شب النار وجلستك بالبر على الرمل مابه فراش ومراكي هات النجر.. ودلال.. ومحماس يالحر و بريق شاهي جنب نارك متاكي أحمد نايف العصيمي - الرياض ياللي تحوف الشاهي أحذر من النار تّوك صغير ما تميز خطرها الله يفكك من لهبها .. والأشرار يا الشاطر أبعد لا يصيبك شررها مشاري الغنام - ثادق النار ما يزهاه غير الدلالي بحضورهن تحلا لنا شربة الشاي يا حلو بالقيلات جمع الغوالي اللي طبيعتهم يهلون بالجاي مشواح ثامر الشمري يا صغير أحذر وانتبه تقرب النار وأعرف خطرها والعواقب وخيمه وابعد عن النيران.. ودروب الاخطار محلا السلامه يا عساها مديمه ريان محمد الخنيفر - الرياض إبريق شاهي يفوح من جذوة النار بجواً عليلٍ وسط أرضٍ عذيّه وفتاً صغيّر جهّزه وسط الأشجار ما خاف في براً وهو بالسعوديه سعود عائش الحربي - القاهرة صورة العدد الماضي المعزّب نسي الدله ما غير ابريقٍ للشاهي من غيره وشلون يفله لو الحطب حوله وراهي أحمد بن عبدالله بن حسن يا صغيّر النّار حرّاقه شاهيك يهناه من ذاقه أطعم من اللي على الطاقه لا صرت بالبر ومشتاقه عبدالكريم عبدالرحمن السلوم يا ما حلا الدّله على جمرة النار في مهمهاً خارج حدود المدينه مع نشامى القوم فارس .. وصقار صغيرهم تنوب عنهم يدينه علي آل زولان الفيفي - بيشة يا روضةٍ طلحها يبّاس فيها الفتى مشعلٍ ناره لا باس يا دارنا لا باس لابد ماتنبت أزهاره غازي بن قاعد العتيبي- الداودمي ياللي شبيت النار وين الدلالي وين البيالات أيضا وين الفناجيل يالله يالوالي على كل والي تغيث البلاد بسيل بثر سيل صالح محمد الحربي ياشاطر أحذرك لا تقرب النار إلى هفها الغربي وطير شررها وش عاد لو شبيتها وسط الاوجار ما أحد يقول النار يؤمن خطرها زبن مقبل العنزي يا مشعلٍ نارك في أرضٍ بها أشجار زيد الحطب ماهو بعيد الميداء يامركب ابريقك على مركب النار إلى خلص شاهيك فابدوا بالغداء محمد الأطرش - القصيم يا اللي تشب النار أحذر تَأذيك خلك حريصٍ وابتعد عن لهبها من صغر سنك والدك يعتزي فيك ودّه مع الأيام يلقى أثرها تركي عبدالله شكر – العلا الصوره اللي شفتها يا بكر بالجريده شوّقت قلبي على شوف الاقفار مع خوّة اللي يكسبون الفريده يالله عساهم من طويلين الاعمار بدر محمد المسعري - وادي الدواسر سولف وأسولف يا فتى والغضا طاب باعلمك وقتٍ على بالي الحين وقتٍ جميل بخاطري دوم ما غاب وقت الطفولة حيّ ذاك الزمن وين! مشاري أبومعطي – الرياض براد شاهي على الكيف والضوء مشبوبه هذا هو اللي يحب الضيف ودلال مصبوبه سميرة سليمان العبرة - الرياض يااللي تصورني وأنا أشب ضوي طالبك ترسلها لصفحة خزامى قاعد وفاظي بس شاسوي والبرد أحسه ساطين بالعظامى عبدالمحسن بن محمد الجريسي - الرياض نستقبل مشاركاتكم الشعرية حتى مساء الاثنين ونستقبل الصور الهادفة والطريفة زاوية (صوت الصورة) على الإيميل الخاص بصفحة الخزامى: [email protected] أو الفاكس رقم: 4871070
