صورةٍ تنبيك عن صِدْق المشاعر ترجمت معنى الأمومه في وضوح

الصوره اللي تدمي القلب والعين
فيها من الحسرات عبره وميله
تخوض في ماها على حد جالين
على الخطر تمشي ولدها تشيله
يا مصوّر الصوره تبي منظرٍ زين
ليه ما تشوف لها طريقة وسيله
ويالله ترحم حالت اللي مساكين
اللي من العيشه حياته هزيله
حمد عبدالله الوايلي - حوطة سدير
من دوّر الحيلة فلا بد يحتال
يظهر حنان الأم للطفل بالحيل
الوضع مخطور ولظرف حلّال
عسى الولي يحفظ عن الغوص والميل
قامت تخوض السيل والوبل همّال
وتعجّل الخطوة قبل يظلم الليل
علي رشيد الرشيد - رياض الخبراء
في المحفره شالت ولدها على الراس
عمق النهر متأكده منه مضبوط
من كثر ماهي تقطعه حطت قياس
احسب متر مع نص يطلع لك الغوط
مصدر سحاب منزّله خالق الناس
ماهوب رس او تجاميع ناقوط
على ضفافه تنتعش كل الاجناس
من كان كاين حي تلقاه مبسوط
سعود عبدالعزيز الهزاع - نعام
لاجل ولدها ماشيه فالخطوره
من لامها جعله على طول معثور
ترفع ولدها خايفه .. ومعذوره
رغم المخاطر سالكه درب محذور
خليف فهيد الحربي - الرياض
الأم وسط السيل قلبٍ حنوني
وحرصٍ شديدٍ خوف يغرق ولدها
حياتها لاجله تراها تهوني
لامن نجا تفرح وتلقى سعدها
وبعض العيال اليوم مايرحموني
أما على الجوال وأمّه وحدها
وبعض البشر ياليتهم يفهموني
للوالدين حقوق لازم سندها
محمد عبدالعزيز الخنيفر - أشيقر
يرحم الله كلّ أمٍّ بالمقابر
ويحفظ اللي حيّةٍ تَغْدِي وْتروح
صورةٍ تنبيك عن صِدْق المشاعر
ترجمت معنى الأمومه في وضوح
ما يوصفها ولو فارس منابر
يعجز التعبير وتْحِيرِ الشروح
أمّ تحمل طفلها رغم المخاطر
في خضم الهول تشبه فلك نوح
في مياهٍ ما عبرها غير شاطر
همها ينجي ضناها لو تروح
أشهد إن الأم عطْفٍ دوم ماطر
وردةٍ بالحب والطيبه تفوح
ناصر جمعان آل عوض - وادي الدواسر
أمٍّ عطت يا ناس دروسٍ ثمينه
بالتضحية والحب فعلٍ وإحساس
ما همّها تغرق ويسلم جنيه
تقودها غزيرةٍ وسط الأنفاس
وحب وحنان الأم ياسع مدينه
الله عطاها الصبر من خلقة الناس
سعود عائش الحربي - جدة
وسط النهر الأم إقفاي واقبال
تشيل الولد بأصعب وسيله جميله
وفيها من النظره همومٍ وغربال
حياتهم ياالله بحسن الحصيله
نطلبك يا رحمن ترحم بالاحوال
وتلطف براسٍ لصعايب يشليه
جمال صالح الحنيني - القصيم
نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
ويا هلا..
صورة العدد السابق
Your browser does not support the video tag.