صوت الصورة

حب الحلال من الصغر يلهم دروس
وأول دروسٍ بالحياة الشجاعه
المرجله.. والطيب ماهيب بفلوس
لكن حياة الإبل تحسن طباعه
أم الحوار تدوس من جا لها دوس
فاحذر على طفلٍ بسن الرضاعه
عثمان الرشيد - الرياض
حب الطفوله يا جمع بين جنسين
حبٍ حقيقي ما دخل فيه تزييف
مابين طفل ومثل سنه حوارين
ثلاثةٍ على بعضهم مواليف
اللي يحب ولايتعامل بقلبين
تضحك له الدنيا دوامٍ على الكيف
زبن مقبل العنزي - بريدة
محلاك يا طفلٍ شجاعٍ وحبوب
تمسح على الحاشي بدون ارتعاشي
ومحلاك يا حاشي جميلٍ بلا عيوب
وأمك وأخوك بحالي العشب ماشي
سعود عائش الحربي - القاهرة
ياصغير لاتجي حول الحويّر
لايصيبك منه شيٍ يوجعك
أوتجيك الناقه اللي ماتضيّر
لاتروح الروح بالك تفجعك
لويشوفك والدك لاماتحيّر
كان في سرعه يبادر يمنعك
حمد عبدالله الوايلي - حوطة سدير
يا أهل الحواشي طفلكم لا تخلوه
البعد مطلب .. والحذر لا توطاه
هذا ولي الأمر بالحيل داووه
ياكيف يترك طفله اليوم وش جاه!
لا تتركون الطفل تكفون وأخذوه
قبل الفجيعه .. قولةٍ يا حلالاه
محمد بن عبد العزيز الخنيفر - أشيقر
حوار توّه منولد ما يشلّي
ما شال نفسه كيف يقدر على الناس؟!
طفلٍ .. وولد بعير .. وغاية تسلّي
وحوار آخر باركٍ كنّه الماس
سعود عبدالعزيز الهزاع - نعام
يا حلوكم يا صغركم يا عزيزين
أبعد تبعّد قبل الحويّر يقومي
عبّرت بإحساسي من الشِّعر بيتين
في شوفكم فعلٍ تزيل الهمومي
سعود سمران الدوسري
حيّ الطفل اللي من العمر سنتين
توّه صغير ضاريٍ بالشجاعه
عند الحوار ويلمس الرأس.. والعين
ما خاف من عضّه ورمحة كراعه
خالد ناصر المخيمر - روضة سدير
صورة فريدة شفتها عبر الإعلام
ترمز معاني يا عرب طول الأجيال
يا رب يسعد عام.. وأعوام.. وأعوام
تجمّعت براءة أطفال .. وآبال
حسن عامر الزهراني
هذا صغير السن لا تتركونه
هذا خطر هذا فعل حيل مخطور
هذا الطفل يا ليتكم تمنعونه
هذي رساله افهموا العلم والشور
وهذي نصيحه ما خفت تعرفونه
يا للأسف من يتركه غير معذور
ريان محمد الخنيفر - الرياض
يا شبل .. يا شبلٍ صغيرٍ ومقدام
أخذ الحذر يا شبل خلّك بعيدي
عساك تسعد دوم في كل الأعوام
وصوره جميله مبدعٍ يا.. الفريدي
بشائر القحطاني- الرياض
صورة العدد السابق