لا تسرفوا يا ناس في صف الاصحان

منظر طعامٍ فوق سفره وممدود
متعدد الأشكال مالذ .. ماطاب
الشكر للخالق تعالى ومعبود
لو شافها المحروم لابد يرتاب
ياللي تصور غيرك اليوم محدود
ارحم ضعيفٍ مسلم عد الأسباب
عبدالمحسن بن محمد المحيسن - رياض الخبراء
موايد السفره تخالط بالألوان
كلٍ على شكله وذوقه.. ولونه
حد الفطور وواصلٍ قرب الأذان
بسم الله الرحمن نبدا بعونه
تم الأجر بالحيل مافيه نقصان
شهر فضيل وفيه خير ومعونه
لاتسرفوا ياناس في صف الاصحان
موسم عباده واجب إنك تصونه
يا كم فقيرٍ مات من مرّ الأحزان
محروم منها دمعته في عيونه
حمد عبدالله الوايلي - حوطة سدير
الأمر واضح واردٍ ضمن الآيات
تأكل وتشرب دون بذخ وإسراف
حسب ابن آدم من طعامه لقيمات
مهوب لازم تنعرض كل الاصناف
ان كان عندك زود شوف القرابات
واحرص على الجيران من ضمن الاهداف
علي رشيد الرشيد - رياض الخبراء
عد الموايد وكثر أصناف
تكفون مالله ومر بيها
يا ناس خلوا البذخ وإسراف
الله يستر تواليها
المقتصد ما عليه اخلاف
أنعام ربي يراعيها
عبد الكريم عبد الرحمن السلوم - القراين
سفره كبيره تحتوي كل الأصناف
ممدودةٍ عند العرب برمضاني
مدري كرم والاهي من نوع الإسراف
يا لله طلبتك لا تضيع الحساني
بعض الاوادم للصور تقل ما شاف
ديار الإسلام اللي من الجوع تعاني
خالد ناصر المخيمر - روضة سدير
ياللي توري سفرتك زيد.. وعبيد
تنشر قبل تأكل لها وش جرى لك
غيرك فقير وينتظر فطرة العيد
مسكين في بيته عفيف متهالك
تراه يرميكم كما رمية الصيد
من دون قصده تنسف العين حالك
ونحمدك يا ربي ونشكرك ونزيد
ونطلب عسى النعمه تزود وتبارك
عبدالكريم النغيمشي - لوذة
سفره فطور مرتّبه من شغل بيت
تسلم يديها من الظهر تسوي إفطار
وافطر على رطيبات وليمن تقهويت
صل وتعشى يصبرك لين الأسحار
وزّع على بطنك ثلاثٍ كما اوحيت
ماجا بحديثٍ لا يسبب لك إعسار
سعود عبدالعزيز الهزاع - نعام
يا ناس خوفوا ربكم يا جماعه
ي اخوف قلبي عقبه الضد ينزال
هذا إسراف وفيه ناس بمجاعه
تدوّر الخبزه تبي تطعم اعيال
هذا حرام وبذخ سوي بساعه
ولابد من يوم يجي فيه سؤال
كم فاقةٍ مرّت علينا اتباعه
يوم الامور الأوله نزال رحال
خليف فهيد الحربي - الرياض
طعام واجد من صنوفٍ كثيره
بشهرٍ فضيل وفيه خيرات وإحسان
يا مسلمين اليوم في كل ديره
واجب علينا نرتل آيات قرآن
بخشوع قلبٍ طاهرٍ في ضميره
ونساعد المحتاج في كل الأوطان
بشائر القحطاني - الرياض
نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
ويا هلا..
صورة العدد المصور راكان الحصيني