بيت وصدى

كان بيت الأسبوع الماضي للشاعر محمد بن عبدالعزيز الخنيفر من أشيقر حول الحفاظ على النعمة وعدم التبذير ويقول:
شفنا النعم بأكوام وسط الزبالات
خوفوا من الله لا يجيكم عقوبه
وكانت الاصداء من الشعراء حول هذا البيت:
البذخ والتبذير ماهو جمالات
لاتصير اخو لابليس تمشي بدروبه
شيابنا بايام قل السيولات
العيش ما ينطال الا بصعوبة
الرز واكوام اللحم في القروبات
مقاطعٍ من رز عرس وخطوبة
سعود بن عبدالعزيز الهزاع - نعام
تذكّروا جوع السنين القديمات
شيبانكم لو تنشدوهم حكوبه
عيشة كسافه والمخابي خليّات
ومن خوفهم ليل الخطر ممْرحوبه.
خوفوا زواله والفتن والعداوات
يهل الفسق عقالكُم مارضوبه
فهد بن عقيل الطويان- بريدة
شكر النعم مفروض ومن العبادات
حذرا من التبذير حذرا ذنوبه
كم مسلم معدوم وسط المجاعات
قيد طعام الحفل مليون نوبه
راعي المشاعر والنعم والزيادات
حذرا تكب الزاد بالرض وطوبه
عبد المحسن المحيسن- رياض الخبراء
كم ناس سهرانه وتشبع ملذات
تاكل وتشرب ماتحصل صعوبه
ماتدري ان الوقت داير وميلات
والي وطى غيرك بسبة ذنوبه
ﻻتامنه لو كان دونه مسافات
تجيك ساعه ثم تصبح نهوبه
حمد عبدالله الوايلي- حوطة سدير
أرع النعم دامك تذوق المذات
كم واحد حرم النعم من ذنوبه
""لا ترمي النعمة تزول المسرات
من يكفر النعمة تصافق جنوبه
لا زاد عندك زاد فيه المبرات
تكفلوا به وللضعيّف سروا به
عثمان ابراهيم الرشيد- الرياض
ياكثر ناسن يرغبون الدعايات
الطيب خالفهم وهم مادروبه
هم ياخذون الدين بدين هي هات
هذا اصحيح اقول ماهي اكذوبه
تفيخرو قدامكم بل خسرات
يالله بوجهك لا تجينا عقوبه
سعد صنهات السهلي- الدرعية
هذا الفعل مرفوض وفعله خطيات
شفنا النعم يا ناس صارت لعوبه
ذي عادة لا بد منا اهتمامات
ولا بد للمخطي يسعى لتوبة
هذي نصيحة منا وفيها نداءات
نوقف هل الأسراف ونوقف اسلوبه
ريان محمد الخنيفر- الرياض
أجدادنا بالقل عاشوا معانات
حل القساء شافوا كدر مع صعوبه
من جوعهم ياما قطعوا للمسافات
والشخص منهم ماملك غير ثوبه
والحمد للي بدل القل بأقوات
ننعم برزق(ن) غيرنا ماانعموبه
عبدالكريم ابن خزيم- البكيرية
يالله يالمعبود و رب السماوات
تحفظ وطنا من شمال وجنوبه
صحيح نشوف فضلات وسط النفايات
والعاقل اللي شاف يخشى العقوبه
صل الفروض الخمس يالعبد بالذات
ومن تاب للمعبود يغفر ذنوبه
شجعان بن سعود المقاطي- الرياض
من يكفر النعمه تصيبه عقوبات
الا الذي يرجع يبادر بتوبه
الشكر واجب والبدايل قريبات
جميعة للبر تعرف دروبه
اهتم بالنعمة بكل المجالات
ترى دروب الخير ما به صعوبة
علي رشيد الرشيد- رياض الخبراء
بيت الاسبوع
يكتبه للصفحة عبدالكريم بن خزيم من البكيرية ويقول:
ياللي علينا تحبكون الأشاعات
كذباتكم عبر الفضاء تزحم الكون
نستقبل صدى هذا البيت بثلاثة أبيات فقط تدور حول هذا الموضوع ويفضل الإرسال عبر الإيميل:
rb-khozama@alriyadh.com
أو على الفاكس 4871070/ 011