بيت وصدى

الأسبوع الماضي كان بيت الأسبوع يناقش قضية تأخر بعض المشاريع في التنفيذ وعدم متابعتها والبيت يقول:
بعض المشاريع من عام وعاميني
محد يجيها ومتروكه للاهمالي
وكان صدى الشعراء:
إلى استلمها المقاول طنش سنين
قدم على منافسينه زود اريالي
راع الطمع مشغله جمع الملاييني
بعد التزامه يخالف ما هو يبالي
لو به غرامه جزا وقت وتأميني
وايطبقن شفت فيه إنجاز وارجالي
فهد بن عقيل الطويان - بريدة
ياليت منهو تولى شغل يوحيني
يراعي الله في شغله ولا يبالي
الشغل أمانه ويوضع بالموازيني
مسؤول عنها أمام الخالق الوالي
من اخلص الفعل يظهر له براهيني
يصير فعله موفق وسط الأفعالي
عبدالمحسن بن محمد الجريسي - الرياض
شف المنفذ توهق حاسه الديني
وزود الحديد اربكه في شيل الاحمالي
ليت التجاره تجي كل شهريني
وتعاقب اللي على الناس يحتالي
عبدالكريم إبراهيم بن خزيم - البكيرية
شفنا شركات تاخذها ولاهيني
لامن رقابه وعلى هالحال ما تبالي
تاخذ مشاريع وتنساها احاييني
وبعد التوافق عليك اليوم تحتالي
وفي فعلها كم نقول اليوم مخطيني
ولازم تجازي على الاهمال بالحالي
محمد بن عبدالعزيز الخنيفر - أشيقر
أمر المشاريع خصص له ملاييني
لكن بعضها ما تم بالاجالي
الأوله لازم(ن) يوضع لها حيني
والثاني امراقبتها خوف الاهمالي
ومن المتابع سبب تأخيرها ايبيني
وتعالج اسبابها ذا التأخير بالحالي
سعود عائش التميمي الحربي - القاهرة
تمر الأشهر وتمضي بعده اسنيني
والشغل واقف عسى الله يستر الحالي
حد المقاول على العسرات والليني
واختر من اللي لثقل الحمل شيالي
علي رشيد الرشيد - رياض الخبراء
الواقع اللي نشوفه صعب يرضيني
مادام قلب المراقب نام من تالي
مدري الخلل فيه والا هو بعد فيني
الكل منا يقول: المال مو مالي
قل الأمانة وضعف الوازع الديني
يهدم صروح بنوها رجال وابطالي
طلال بن غارم فرحان آل فرحان - الرياض
بيت الأسبوع القادم
حول موضوع المبالغة في ولائم العزاء والبهرجة التي ترافق أيام العزاء فقد أرسل الشاعر عبدالكريم بن إبراهيم بن خزيم هذا البيت:
عمر الحزن ما ترجمته المفاطيح
وترى العزاء ما هو مجال المباهاة
نستقبل صدى هذا البيت بثلاثة أبيات فقط تدور حول هذا الموضوع الاجتماعي الهام وذلك على الفاكس (4871070) أو الايميل rb-khozama@alriyadh.com
مقترح لبيت الأسبوع القادم
الوعي في قيادة السيارات موضوع بعث به للصفحة الأخ تركي بن جدي الشمري من الرياض