بيت وصدى

إعداد - بكر هذال
الاسبوع الماضي كان بيت الاسبوع من نظم الشاعر محمد نخيلان الحربي من القصيم والذي يقول:
متقاعدين على ألف وخمس مقصوره
وإن زاد عنهن تجاوز حول الألفيني
وقد تفاعل الشعراء مع هذا البيت وكانت مشاركاتهم جميلة وهادفة:
نهار تصرف يجينا كم فاتوره
مطلوب تسديدها حسب القوانيني
ياهل ترى ويش نبقي منه لا بزوره
وظيف يريد الكرم عند الكريميني
ياالله ياعالم لا حوال مستوره
اتبدل الحال للاجواد باليني
بدر بن خلف الحزيمي
الألف والخمس في هالوقت وش دوره
اجار والامصاريفٍ تمشيني
والمشكله كل جيب وفيه فاتوره
وقبل المصاريف نبلش في هل الديني
واناشد المجلس اللي محكم شوره
ينظر لمتقاعدن عمره بستيني
محمد مذكر العتيبي
بيت القصيده يوضح للبشر صوره
وينقل معاناتها وسط الدواويني
لأهل القرارات منقوله ومنشوره
تقاعدي ماهو بيشبع وراعيني
راعي الوزارة يصرح عن مدى دوره
ماشاف حالي وانا في بيتي الطيني
سعيد بن سعد آل سحيم
عقب التقاعد امخلا وانتها دوره
ايكابد هموم صدره بين قوسيني
ألفٍ بقاله وخمسٍ رسم فاتوره
والله ايعينه على الاسلاف والديني
امنين ياكل ومنين امشي ابزوره
لا صار محدود دخله قل لي امنيي
حمود فهد الدوسري - وادي الدواسر
كم واحدٍ راتبه ما يكفي بزوره
عليه كثر البلاء والهم والديني
بعضه لورعانه وبعضه لفاتوره
وايجار بيت مطوف حول عاميني
يلعب به الهم لعب بليه بالكوره
لاحقق الفوز قدم الملاييني
عيد عبدالله المسردي - جاش
الله يعينك عسى الأحوال مستوره
ياكيف وبالله تعيش ذلو راعيني
البعض شبعان ساكت ماحكا دوره
وان نشد عنكم يقال ان كلشٍ زيني
ياوينكم يارجال الحق والشوره
ايلي رفعتو ترى اللي فوق وافيني
غنام مسعود القريني - نعام
الله يفرج على من يبتدي شوره
من مستشار ووزير ورجل ذهيني
علينا أقصاد ومصروفات محصوره
وتسديد اجار وفواتير مع الديني
ومجلس الشورى لازم يبتدي دوره
ويعرض تفاصيل عن كل المساكين
محمد عبدالله المجلي - حوطة بني تميم
من أول فالعمل وموديا دوره
واليوم يأهل الوفاء مسكين مسكيني
وغيره مبنك يحسب الناس ميسوره
متبستنا بين زاهيت البساتيني
والمشكله كان عودا معه باكوره
ومن البزارين عنده فوق عشريني
محمد جلمود الشكره - الدلم
يالله انا طالبك والحال مستوره
ان ترحم اللي عياله حول عشريني
لا جا التقاعد لفت ملفاه فاتوره
هاتف وكهرب واجار وباقي الديني
بعض الليالي يطير النوم ما احجوره
لا قال راعي البقاله لا تخليني
مبارك محمد الدوسري - وادي الدواسر
أقول في حالة ماهيب ميسوره
ياليت ينظر لهم قلنا مساكيني
مؤجر ينهشه والبيت وبزوره
الكل يطلب ولا بيديه قرشيني
ضاع الضعيف ونفسه غيره مسروره
مثله وغيره ترى غرقان بالديني
محمد بن عبدالعزيز الخنيفر - أشيقر
كل التقاعد ما يسدد بس فاتوره
وكلا تجيه من الفواتير فوق عشريني
لا نشتري ولا نبيع ولا نلعب الكوره
ولا من وظيفة وطول الوقت فاضيني
وعن مشكلتنا اعلنت بالصوت والصوره
عبر الخزامى وقراءها الملاييني
زبن مقبل العنزي - بريدة
أنا شايف ما شفت من النقص واقصوره
أشوف الميه فيها نقص تسعيني
المعيشة غالية والاحوال مستوره
وراتب التقاعد قليل ما يكفيني
لاجا آخر الشهر جاي عشرين فاتوره
ثم قسمت الألف والخمس بين الديايني
راشد موفي القحطاني - حويرة - نساح
بيت الاسبوع
كتبه لزاوية «بيت وصدى» الشاعر سعود بن سعد الحافي من الرياض ويقول:
من يوم ما يعلن على السوق تخفيض
تلقى العرب تجري وشبت شببها
نستقبل مشاركاتكم لصدى البيت بثلاثة أبيات فقط وبخط واضح على الفاكس رقم 4871070 «خزامى الصحارى» زاوية بيت وصدى.