بيت وصدى

كان بيت الأسبوع من طرح الشاعر محمد عبدالعزيز الخنيفر من الرياض والذي يناقش قضية الاسراف في حفلات الأعراس نشاهد التبذير في بعض الأعراس وصحون تنثر للأسف بالنفايات وكان صدى الشعراء:
بالشكر وارعوا نعمة الله يا ناس
شكر النعم توكيد أحاديث وآيات
خافوا وخلوا عندكم حس واحساس
كم عالم تعيش فقر ومجاعات
البذخ والتبذير مهوب نوماس
ترى بها لابليس طاعة ومرضاة
عبدالعزيز بن حمد البريثن
البارحة شفت الذبايح فالاكياس
وطرى علي بيت قريته على ات
بيت وصدى وابيات مالراس لراس
في بيت جاء ذكره على ما هو ات
(نشاهد التبذير في بعض الأعراض
وصحون تنثر للأسف بالنفايات)
عبدالله بن لافي - الرياض
لاجت وليمه ثم دعاله من الناس
كثر دعاوي وبث فيها دعايات
قال احضروا لاجاكم العوق والباس
لازم لزوم والوعد استراحات
ترا العشا من مطعم فيه الأجناس
غالي وما يغلى عليكم مقامات
حمد عبدالله الوايلي - حوطة سدير
كفر النعم نقمه على انس واجناس
والله ومرنا بالزهد والعبادات
ياناس خافوا خالق الكون والناس
ولايم الأعراس ظلم وجنايات
بعض التباهي والبذخ فعل خناس
ما يرضي المعبود رب السموات
علي جابر آل زولان الفيفي - أبها
أبدى بذكر الله هو خالق الناس
اللي من التبذير ينهى بالآيات
مالك عذر ياللي تبذر بلا قياس
لا ترتكب في فرحتك أي سيات
لا تدور الاعذار وتقول لاباس
ماب الفرح تبذير لاجل الدعايات
راشد الورثان - الأفلاج
التبذير في الحفلات ماهو نوماس
أيضاً ولافي العرس يعمل دعايات
خلك كريم يا رجل بس بقياس
والمبذر اخو بليس نازل به آيات
الرز يرمى زايداً كنه أطعاس
وظهر الحشو فوق الصباني الكبيرات
سعود بن عبدالعزيز الهزاع - نعام
مصيبة والله يبغى لها قياس
زود الذبايح خاصة بالزواجات
بالعرس الواحد يجيبون كم راس
تزيد على العشرين في كل الأوقات
تكفون يا الاخوان يا ربع يا ناس
ارفقوا اشوي لاتجينا العقوبات
عبدالله علي الحوشاني - الرياض
تنويه
سوف تتوقف زاوية بيت وصدى بسبب تمتع معد الزاوية بإجازته السنوية وسوف تعود للظهور بعد عودته بالسلامة إن شاء الله.