حكامنا من كل خيرٍ قريبين

تسلم لنا يا خادم البيت والدين
يابن الإمام اللي ملكها بجداره
يا عاهل الدوله وشمس السلاطين
يارمزنا اللي عز أهله وداره
يا بوفهد لك المعالي عناوين
شعبك رفعته في سنام الصداره
حبك لنا غيثٍ وعطفك بساتين
رَسْمِك بشاراتٍ وعهْدك بشاره
آمر وتلقانا جنودٍ ملبين
تحت الطلب حنا برهن الإشاره
على العَهَد في ساعة العسر واللين
شعبٍ وفي فيه الشجاعه نماره
عهدٍ يسر أهل الوفا والمحبين
وقعه على المبغض جحيم ومراره
أحفاد من حاز النصر يوم حطين
واحفاد من أرسى دعايم حضاره
واحفاد من عاشَوْ رؤوسٍ عزيزين
راحت حياة اللي جهلهم خساره
نكعم خْشوم أهل الفساد المعادين
من رادنا بالشر يظلم نهاره
ياطامعٍ ببلادنا وينك ووين
من ذاق ضربتنا تغير مساره
العز لبسنا فخار ونياشين
في ديارنا شعشع وفتح نواره
وقفاتنا بِيضِ بكل الميادين
عيد النفوس اللي شِوَتْها حراره
ابلادنا أرض الرساله وبيتين
أكرم بقاع الأرض قَدْر وطهاره
زبن الصديق اللي شكى الجور والبين
الطيب عادتنا وحنا مداره
نفزع ولا نجزع أباةٍ غيورين
للطايله دومٍ نسوق البشاره
كل الوقايع مِثْبتَه بالبراهين
نقشٍ بوجه المجد يلمع نضاره
منهاجنا شرع اللي خلقنا من الطين
أقوالنا وافعالنا في إطاره
حكامنا من كل خيرٍ قريبين
طبعٍ أصيلٍ ما خذوه استعاره
أفعالهم ترجح بكل الموازين
من كل فضلٍ ماخذينٍ خياره
عَلِّ المؤسس في جوار النبيين
ويرحم ملوكٍ ما اخلفوا عن قراره
ويحفظك يا سلمان طَلْق الحجاجين
زلزلت خوانٍ غدر في جواره
والله يسدد درب كل العضيدين
أعمالهم مابين جود وجساره
وصلاة ربي عِدّ ورد وْرياحين
تبلغ نبيٍّ أرسله بالنذاره
ناصر جمعان آل عوض