الأسبوع الماضي كان بيت الأسبوع من طرح الشاعر غنام مسعود القريني الذي يقول: يا كيف نسلم من كثير العماله لا روحوا مع درب شفناهم بدرب وقد تجاوب الشعراء مع قضية البيت وكان صداهم رائعاً: نسلم إذا الدار اخلصو له رجاله وطاعو ولي الأمر فاليسر والكرب وترك هذاك الرجل درب الختاله وساب الدروب اللي معاها الرجل هرب نقدر نطهر دارنا من الحثاله ونعيش باحسن حال واحسن من الغرب سلطان حمد الحبابي - الطائف قلته وأنا عندي على ذا دلاله قد شفت ما قلته وما قيل عن قرب حطوا لهم بصمه تحقق عداله حتى نعرفه زين لا جا مع الدرب ونقول عود يا صبي الجهاله يحرم عليك الدار والزاد والشرب إبراهيم بن مسمار القحطاني - الرياض نسلم بتقليل الطلب والكفاله منا الخطا ما هو للأجناب والغرب ابن الوطن منه الخطا باتكاله على العماله كنهم دايماً قرب من لاجلبهم صاح وأرسل اعياله لو حاجته فيش يبي شد أو كرب فهد بن عقيل الطويان - بريدة باسم السعودي وشاركت في حلاله بديارنا تلقاه فالشرق والغرب واحد على الاجرام ماله بداله بداخل وطنا هاوي الحرب والضرب لوزيرنا المحبوب منا رساله ترى السعودي يعتزي ساعة الكرب محمد بن عبدالعزيز الخنيفر - أشيقر بيت جميل من رجال الجماله ما عاف شاف ابن الحموله على قرب ابنا وطنا يشتكون البطاله والأجنبي فالدار فالشرق والغرب نبغا نوجه للقصيبي رساله في يد من حديد ملزوم الضرب شبيب بن هذال السبيعي - الرياض قولك عديل وخالي من الميا له هي آفة يحسب لها الشرق والغرب يا كثرهم وسط الشوارع هماله لا شفتهم كني غريب مع الدرب وين الكفيل اللي تحمل كفاله اللي طلب إذن العمل ساعة الكرب سعود بن سعد الحافي - الرياض غنام من يعمل لنا بالبقاله لو ان بعضنا بالعمل يضربه ضرب لو كثرو ما هم سبب للبطاله لو هم من اليابان والا من الصرب من شيد البنيان فوق الصقاله من يلحق الحيران من يطلي الجرب جميل بن محمد العنزي - الرياض اللي على النظام تحت الكفاله هذا نظامي عريب من العرب ومشغل المجهول كله جهاله يبغى الطلا فن الطلا يطلي الجرب مسفر بن ثابت القحطاني وصلو بلدنا كلهم بالكفاله وان شاف مشكل من كفيله غدا قرب متعلمين وعارفين الحياله لا تسأل الطبيب وأسل هل الدرب تلقاه في خضار ولا بقاله وان جاه علم مسرعه صابه الهرب خالد غنام القريني - نعام تسلم يا بو مشعل وهذي الجماله فزعتك جات اليوم وأنا لها طرب السعودة تبي حقوق وعداله وقول الوزير اليوم ينشاف عن قرب اللي يشغل من يخالف جهاله ودور المواطن للمخالف كما الحرب محمد عبدالله المجلي - حوطة بني تميم بيت الأسبوع طرحه لزاوية بيت وصدى الشاعر سميحان فهد السويدي من الرياض ويتناول قضية الحذر من ايقاد الفحم والدفايات بدون الأخذ بوسائل السلامة، حما الله الجميع ويقول: يا مشعل النار في بيتك وتبغى دفا حذراك يا صاحبي للنار غدر وهلاك نستقبل صدى البيت بثلاثة أبيات فقط بحيث تناقش الموضوع المطروح على فاكس (4871070) خزامى الصحارى زاوية بيت وصدى. كما نرحب بطرح بيت الأسبوع على أن يناقش قضية اجتماعية هادفة.
