اللغز

كان لغز الاسبوع الماضي للشاعر فزاع عبدالله الشمري من حايل ويقول:
وش غلام في ذرى ظل وسكون
عن هبوب زمهرير مستكن
بالغلا مضرب مثل للي يكون
عندنا غالي وغالي بالسكن
هوجمال امه بلياها ظنون
الروايات القديمه به حكن
والحلول من الشعراء:
يافزاع الحل عندك بالعيون
والله إنه مايعادل بالثمن
ذاك صبي العين عندي مايهون
يالله إنك تنصر حمات الوطن
محمد بن عبدالرحمن ابودحيم - البدائع
مرحباً بك عد هطّال المزون
بالخزامى لك تحاياً ياصلن
رمعتي للغزك في نُون العيون
النظير إليا لحظن أو سلهمن
و تقبلوا تحياتي و تقديري
أبو عبد الملك السحيباني - الرياض
اهل حايل للمعاني يدركون
وضيفهم بعيونهم ماخذ ركن
وغلامهم اللي عنه ينشدون
انشد عنه العيون اليا بكن
الصبي اللي مجمل للعيون
هو مقر اللي غلاهم له نكن
فهد العويجان - الرياض
حي لغزٍ بالخزامى في فنون
رغم صغره ياجماعه مستكن
ذا صبي العين في وسط العيون
مزيّن امه في مكانه مطمئن
خليف فهيد الحربي - الرياض
جاك يافزاع حلي ولاتهون
لغزك المحبوك رايع واطمئن
سر خلقه ما حصوها يعجزون
شف صبي العين من ماضي زمن
احمد بن ناصر المحرج - الرياض
مرحبا بك عد امطار المزون
واعداد مايبني من انواع السكن
حل لغزك باللغه لا قلت نون
هو صبي العين فيها مستكن
علي رشيد الرشيد - رياض الخبراء
حل لغزك مالقيناها بهون
بذوق واحترام واسلوب وفن
ذا صبي العين للي يعرفون
جل رب خالق عين وسن
فالح غازي الحربي - رياض الخبراء
دوك حلي وفيه غيري يرمعون
رمعتي جاتك صحيح مهو ضن
ذا صبي مسكنه جوا العيون
يسترنه ياولد لاغمضن
سعد صنهات السهلي - الدرعية
ذا صبي العين من بين الجفون
دونه اللي تقل لمبات طفن
نعمة يحسد عليها اهل العيون
نعمه ماهي تقدر بالثمن
عبداللطيف الحُمَيَّانِي - عنيزة
لغز الاسبوع
كتبه للصفحة الشاعر أحمد بن ناصر المحرج من الرياض ويقول:
اللي كذوب من الكذب جنٌ بناته
هو جابهم والرجل ياناس كذاب
ينسب لغدارٍ كريهه صفاته
معروف واللي يعرفه زين الاجناب
واصبح مثل للي كثيرة رداته
ياخذ لزومه ثم يقفى مع الباب