صوت الصورة

يا موج يا للي للعشاشيق موال
يا كم على بحرك رسى من سفينه
أصبحت لعيون الرياضيين مدهال
وأهل التزلّج عشقهم راسمينه
راع المطيّه جاء يتفرّج ومهتال
ودّه يشارك خايف الله يعينه
ياما على اشداده بطولات وأهوال
هذا الجمل رمز الصبر خابرينه
خالد ناصر المخيمر - روضة سدير
أحذّرك يا ملاعب الأمواج
تبعد عن الهرش لو هاجي
فيما مضى ينقل الحجّاج
واليوم في ساحل العاجي
عبدالكريم عبدالرحمن السلّوم - القرائن
ياهل الركايب حاسبوا لاتدشون
هذا بحر ماهوب لأهل الركايب
لو كان بالساحل بتلتوا تدوجون
أخير من وضعٍ يجيب المصايب
ياهل الشراع اللي عليهم تحومون
صيحوا عليهم لا يجون الغبايب
ترى البحر غدّار للي يعومون
كم هالكٍ حطوا عليه النصايب
حمد عبدالله الوايلي - حوطة سدير
سفينة الصحراء تبدّل هواها
عن حومة النقيان وأرض الصحاري
اشوفها باليم تسبح بماها
متحديه للفلك ذات الصواري
حمر النعم يا زين من هو قناها
بالبر تمشي والبحر له جواري
بكتابنا القرآن يامن قراها
منهو ذكر للبل زاد انبهاري
عبدالكريم النغيمشي - لوذة
هجن السواحل فالبحر تمشي بهون
فالماء وفاليابس سفينه للاثنين
طبيعة الواقع بها يستدلون
سبل التنقل ما يكود البعارين
موازيه للنش خطرٍ يطوفون
لولا مواطي خفوفهن تسقط بطين
سعود عبدالعزيز الهزاع - نعام
وسط البحر سفن الصحاري بالأمواج
يا رب سترك لا تزيد الرياحي
ويختل الجمل ويزيد الازعاج بزعاج
والبحر يبعد عنه زائر .. وسواحي
سعد ناصر المسفر
نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
أو الفاكس رقم: 0114871070
ويا هلا..
صورة العدد السابق