الأشواق حراقة

عيت سفينتك لا ترسي على مينا
بشراعها مع هبوب الريح منساقة
ما ابعدتنا عن هواك ولا انت مدنينا
والشهم مثلي تحكم افعاله اخلاقه
اتصك بابك ومن خلفه تنادينا
والقلب مشتاق والاشواق حراقة
لكن خف الله فينا لا تعنينا
لو تحرق القلب ويش يفيدك احراقه
لا اسقيت ذودك ولا خليت وادينا
ينزل به اللي يعرف العلم بنياقه
وان رحت عنا يبا الله عنك يغنينا
اللي يبا افراقي الله مطيب افراقه
لكن اشوفك تبا تخلف مبادينا
وصاحبك يم الرديه ما درج ساقه
واليوم لا والله احذر من هقاوينا
صبر عليك الحليم وخربت اخلاقه
بيصير علمًا يزعلكم ويرضينا
علم لك الله جاي لي على فاقه
اما تجنب هناك ولا تحاكينا
والا افتح الباب قبل انقز مع الطاقة