محاورة

مطلق الثبيتي
الحريبي ينفض اللحية ويطوي في معمه
طار عقله من شليويح المطيري والزلامي
البعير اللي يشيل الحمل عود يرضع امه
بعد قالوا شامخ النيبان مردوم السنامي
صياف الحربي
الحريبي يوم غنى حطكم في راس كمه
ثم خلاكم عجينه كن مافيكم عظامي
الجمل يمشي على الدرب وكلامك ما يهمه
من هديره قمت من نومك وحرمت المنامي
مطلق الثبيتي
الزمان اللي ستر حالك وحالي لا تذمه
والحرم من دونه المسعى وبيبان السلامي
انت داب كل ما حرك شدوقه سال سمه
والله انا مانذوق السم يا لداب التهامي
صياف الحربي
انت ذيب تكره البارود لو انك تشمه
ما تحب النور الابيض ما تحب الا الظلامي
الطعام اللي الى شفته على صدرك تضمه
لا تقول انه حلال ولا تقول انه حرامي
مطلق الثبيتي
علموا صياف لا يتبع خفيف الظل عمه
دام انا واياه فالمذهب وفالطرقه ليامي
قله انا ما نبا اللي بيننا نقال نمه
بعد عوّد بيعة بين القبايل ما يسامي
صياف الحربي
انت اشوفك كل ما تسرح تضوي لك مطمه
تحسد المسلم على دينه ليا صلى وصامي
لا يزعلك الكلام اللي عسى ربي يتمه
ثم بده مستريح بلا شراب ولا طعامي
مطلق الثبيتي
كل شي في طريقك يابيض الشارب تخمه
لين ضيعت الفشق والبندقيه والحزامي
ان نثرت القش ياصياف ماتقدر تلمه
وان قربت من العرب ميسمك جوف النار حامي
صياف الحربي
لو ترك لك صاحبك باب الخزينه رحت يمه
وان نظرلك نظرة حمراء تعديت النظامي
المسافر ما يطب البحر لين انه يطمه
يذكر الله في بلد مكه ويلبس له حرامي
مطلق الثبيتي
انت مانت مستشار ولا انت ريس مجلس امه
انت غصن الحنظله مالك زهور ولا نوامي
جيت عند الحسو ضامي مير ماللحسو جمه
ماخبل اللي يحسب ان الحسو يروي كل ضامي
صياف الحربي
لو يحطوك العرب ريس قضاء مافيك ذمه
يوم تضحك لي بسن ويوم تزعل من كلامي
لا تنزلك الدروب العوج وانت براس قمه
ثم لو اتموت ماقلنا لعله للرحامي
مطلق الثبيتي
والله انك تعرف النقاش صواغ الازمه
هات ياصياف خشمك كان تبغي له زمامي
ماخبل اللي يرسلونك يالحريبي في مهمه
وانت في رجلك سلاسل وانت في راسك خطامي
صياف الحربي
ثوبك الابيض تغير يوم طولت الاكمه
مير ليتك تصبغه بالسدر وعروق البشامي