محاورة

حبيب العازمي
مرحبا من هيض صدرٍ مدى سده بعيد
ما يبيّح بالسراير وحظه معتلي
السنه تبدي وتقضي وتبدي من جديد
وأنت يالحربي تحدى ونارك تصطلي
صياف الحربي
البقا باللي بداها على الفال الرشيد
نوب يرقص مع جهينه ونوبٍ مع بلي
السنه يعرف عددها ما ينفص ما يزيد
والبشر تاكل لو ان الصحن ما يمتلي
حبيب العازمي
لا يغرك ما يفك الحديد الا الحديد
سالفة في المذهب الشافعي والحنبلي
لا تخليها طويلة ترى ما تستفيد
كيف رجلٍ معك سكر وتاكل لك طلي
صياف الحربي
أنت رجالٍ محكّم وشاطر في القصيد
مير تسرح مع عتيبة وتمسي عبدلي
العيون الحول ترمي كثير ولا تصيد
وأنت لا شفت الطلي قلت يا خيّ خل لي
حبيب العازمي
معك عفريتٍ محنك وشيطانٍ مريد
يوم ياصياف حربي ويومين اسهلي
ياهبوب الريح هبي على خضر الجريد
ما حكم فاهل المدينة حسين ولا علي
صياف الحربي
ما رماك ابقاعة البير غير ام العبيد
وان رجعنا للحلايا ترى مالك حلي
في ثلاث ايام نرسل حبيب في البريد
البنادم يبتلَى والبنادم يبتلي
حبيب العازمي
ياسفير اسويسرا والبنوك ام الرصيد
يوم قلت العام خلك معي وش قلت لي
حزّةٍ فيها نطقك تراها يوم عيد
طقةٍ في الراس والا في عرق الاكحلي
صياف الحربي
يوم غف الك السمن والقدور ام العصيد
قلت لك فوقك رعود وسحاب ايهلهلي
لو معك سكين يمديك ذكيت الهريد
وان فزع لك عازمي قلت منته من هلي
حبيب العازمي
بين رابغ والقضيمة تصيد اللي تصيد
والعصيمي لا يشوفك يلقيك الخلي
لوّ دمك عقب همّك يضخّ مع الوريد
كان ترضى من رضاية ويزعلك ازعلي
صياف الحربي
أنت ياراعي الدفينة شقي مدري سعيد
في يدك مجنون ما ينطبخ ما ينقلي
كان في راسك ظفر قيّد العاصي بقيد
واترك الثيران تشرب وتاكل في حلي
حبيب العازمي
أنت ياراعي المدينة مشعوذ ما تهيد
فالقطيف اثنين والثالث أنته يالولي
امتلت حفرة جهنم وياهل من مزيد
يا صواقع صرقعي يا زلازل زلزلي
صياف الحربي
ما يغش الأرض غير انت يا هذا الوليد
راسك اقرع والشعر مثل حب الفلفلي
لوّ رفّعنا اربعة من نقيب اليا عقيد
جاتنا ليلة شهر مظلمة ما تنجلي