نجمة وباب

ياليلة فيها بعيد الريح يصفر ويعوي
جابت من اخبار الشتا مالذ للفرقى وطاب
مرت ولا مرت بها اللحظة على الوجه السوي
لاجل اندرق عن بندق الشرهة ورماي العتاب
كتبتها وانا ادري ان الضعف للمحبط قوي
يقين يهزم واقع الغدرا ويعصف بالرقاب
كتبتها والبا مدوزنها على الحرف الروي
احاول اطرقها واخاتل بالضيا نجمة وباب
واضرب وانا في غبة المجهول افكر وارعوي
واقول في نفسي واهزالضلع واوغل فالرحاب
هذي عصاك وهذي الغربة والاقدام تهوي
على كثيب الرمل والمنفى يباب في يباب
وهذي رحولك لا شداد ابها ولا عرق روي
والبرد يا هذا الفتى سر من اسرار الغياب
صارت لك الدنيا دواهي برد والموقد خوي
تقرا عليه الريح من لوح الشتا كذبة كتاب
ما عاد لك من جمرة احلامك دفا لو تكتوي
ما يدفي الا رهبة الحمى من اشباه الدوب
تحن في صدرك مطاليع الكلام المسقوي
وتردد اجملها على باب التلاقي والعذاب
تخونك اصحابك وتشوي طيبك الفاتر شوي
من بعد ما كنت الذرى والظل والما والسحاب
ويخونك اقرابك وتبقى في نواظرهم ذوي
غصنٍ لحته الريح والسافي وبارود السراب
ويخونك الاسفلت والضوضا يبو وجه قروي
وتعرض احلامك لسكين الشتايم والسباب
وتخونك الدنيا وما فيها وتهدر وتعوي
لاصرت مخلص ماتخون الناس وتخون التراب