امتزج حب المواطن بحب الحاكمين

ألقيت هذه القصيدة في احتفال أهالي ضرما بعيد الفطر المبارك
أبتدي بسم الله اللي عليه الاتكال
ربنا اللي به على كل شي نستعين
جيت أشارك في تفاعل ومن غير انفعال
بحفلكم يا اهل ضرما يالنشاما الطيبين
والصدى صار يتردد على روس الجبال
بفرحةٍ عمت وطنا بعيد المسلمين
عمت الفرحة وزدنا حماس واشتعال
الفرح شفناه بوجوه كل الحاضرين
والتهاني للمليك البطل ليث الرجال
أبو متعب ذخرنا يالله انك له تعين
دام أبو متعب لنا عن هوى لفح الشمال
هو ذرانا عن سموم وبراد بكل حين
قايد الشعب السعودي لنا رمز ومثال
بالعدل والراي معروف بين العالمين
كل بابٍ يطرقه ما تعذر واستحال
بالوفا والطيب ماله وصيف ولا حتين
غيثنا الوسمي ومنه الوطن بالخير سال
الرخا عمّ الوطن من يسار ومن يمين
كل يوم في الوطن للمشاريع احتفال
والمكارم والعطايا توالى كل حين
وكل همٍ للمواطن بفضل الله زال
أنت ذخر للأرامل وكل المعوزين
ونايبك سلطان عضدك وحمّال الثقال
هو ولي العهد رجل الشجاعة والامين
هو عضيدك يا مليك الوطن في كل حال
واقفٍ دون الوطن درع ضد المعتدين
هو كريم الطبع والكف هو واف الخصال
وهو ريف الكهل والجار واللي معسرين
ونايف اللي للأمن ساهرٍ طول الليال
حارب الإرهاب وأهل الضلال المفسدين
والأمير اللي عطى العاصمة نور وجمال
ذاك رجل البر سلمان سيد العارفين
يا أسرة آل سعود حكامنا بأول وتال
الوطن بافعالكم صايرٍ حصن حصين
يا هل التاريخ والمجد وملوك النضال
الله اللي خصكم بالفخر دنيا ودين
مملكتنا عمها الخير في أمن وظلال
يشهد العالم وكل الرجال المنصفين
نهضة من شافها ما يصدق واستهال
من فضل ربي وفعل الملوك المخلصين
والخطط مدروسةٍ دون ربكة وارتجال
من ملوك ارتووا من رياض الصالحين
وشعبكم معكم على العهد باقٍ ما يزال
بأمركم لأجل الوطن في اللزوم مجندين
حكمكم بالشرع لله طاعة وامتثال
لكل ما جا في الكتاب الكريم مطبقين
شعبكم من عدلكم ما يبي فيكم بدال
امتزج حب المواطن بحب الحاكمين
والحكي والبلبلة ما لراعيها مجال
ما نصدق كل حاسد ومن حقده دفين
من يريد العبث بالأمن ما ياجد مجال
الحرس والجيش والأمن ضد العابثين
مملكتنا ما شكت من فقر والا احتلال
من قديم الوقت إلى اليوم في حرز مكين
يالله احفظها من أهل الجهالة والضلال
جعلها بحماك عن كيد كل الطامعين
تحت ظل القادة اللي يروون السلال
وشعبهم معهم على العهد في شده ولين
ندعو الله كل ساعة وفي كل ابتهال
يوفق الأحيا ويرحم ملوك ميتين
اعذروني كان في القول نقص واختزال
نعترف مهما كتبنا نصير مقصرين
والختم صلّوا على اللي لنا يوم المآل
هو شفيع الخلق خاتم جميع المرسلين