حاتم آل سعود

ماجور يامير الوفاء واللبابي
يا راعي الجزلات في كل سيره
سلامتك من كل شر وعذابي
سلامتك سرّت وجيه العشيره
أنت الذي في اللازمه لك مثابي
وسيرتك يا سلطان خير وبريره
خيرك علينا مثل وبل السحابي
يا حاتم آل سعود وأهل الجزيره
يدعون من فلاوديه والروابي
وأهل القرى وأهل البلاد الكبيره
إيجنبك من كل شر وعيابي
اللي برج لأيوب وأبصر نظيره
وما قل دل لمن يعرف الجوابي
وحنا عرفنا الوقت شره وخيره
يالله يالمعبود جزل الثوابي
تحمي البلاد من الوجيه الشريره
التايهين عن الطريق الصوابي
ما زعزعوا ضلعٍ أحصونه كبيره
الريح ما خلف راسيات الهضابي
والقرد مؤذي للجمال النضيره
في مثلهم عسى تسن الحرابي
لين العشير ايقوم يشتم عشيره
وحنا عتيبه قاضبين النصابي
يشهد لنا توحيد شبه الجزيره
أيام أبو تركي يحث الركابي
إلى عمد من ديرة صوب ديره
قبيلة نرخص غوال الرقابي
ان شبوا العدوان للحرب نيره
ناطى محلات الخطر ما نهابي
وبانظارنا لو كان تكبر صغيره
ومن شذ منا ما نقص في الحسابي
ولا ينقص الزراع حبة شعيره
ولا هو يمثلنا ردي المسابي
باسه على راسه خبيث الجريره
وختام ما عبرت به في خطابي
تسلم يا بو خالد اسنيناً كثيره
والكم تحياتي الأديب الذيابي
ترفع لكم يا مواصلين المسيره
وماجور يا مير الوفاء واللبابي
يا راعي الجزلات في كل سيره