حنا أهل السنة حماة العقيدة

هذه القصيدة معايدة بمناسبة عيد الفطر المبارك ألقيت أمام صاحب السمو الملكي الأمير سطام بن عبدالعزيز نائب أمير منطقة الرياض يوم الثلاثاء 1/10/1424ه
يا الله يا ساتر مساوئ عبيده
يا مدبر ذا الكون بحره وبره
أنت الذي الأفلاك في قبضة إيده
ومتقلبات الوقت برده وحره
هات القلم واكتب حروف القصيدة
وأصوغ لك من غالي الدرره
العيد هل ويا عسى الله يعيده
على وطنا باليمن والمسرة
أعاده الله في سنين عديدة
وحنا بخير ولا لحقنا مضرة
وأعمارنا في طاعة الله مديدة
ومن طال عمره ذاق حلوه ومره
قبل الفرح كل يراجع رصيده
لحظة عتاب ولوم لو بس مرة
به ناس عقب صيامها مستفيدة
وبه ناس ما زادت بمثقال ذرة
حنا هل السنة حماة العقيدة
من رادنا بشر كفى الله شره
المعتدي نسألك يا الله تبيده
اللي جلب لأمته ذل يجره
خبل يدبر لأهله أكبر مكيدة
حسبي على من درسه ثم غره
مغبة أفعاله شنيعة شديدة
راحت بها أرواح برية وحرة
وهدمت بيوت عامرات مشيدة
ما حولها إلا مسجد أو مبرة
مير العزى سيف يقص الحديدة
ما يبقي لراعي التدابير جره
حنا لنا وقفة ولا هي جديدة
ومليكنا في قلوب شعبه مقره
الوضع طيب والحكومة رشيدة
واحوالنا رغم الفتن مستقرة
آل السعود أهل الفعول المجيدة
بنوا لنا حضارة مستمرة
أفضالهم عمت ديار بعيدة
كم واسوا اللي جيبه الهم طره
صلاة ربي عد حرف الجريدة
على نبي الله لله دره