جيش الوطن ذخر الوطن للمقابيل

يافكر عطني للوطن اجمل القيل
هات الحروف اللي تناسب مقامي
يا دارنا نفداك جيل ورا جيل
انتِ منار الكون حرب وسلامي
المملكة فيها الرجال الحلاحيل
اللي تحامي ماتهاب الزحامي
دارٍ غذتنا ياعساها الهماليل
تسقي ثراها بالوفا والتمامي
وتسقي ثرى ناسٍ بقلبي قناديل
منزالهم في ترابها بالظلامي
ندعي لهم ربٍ عليه التواكيل
ربٍ رحيمٍ دعوتي له دوامي
ونسوق فنجال الغلا ودلة الهيل
للي عن بلاده بنفسه يحامي
جيش الوطن ذخر الوطن للمقابيل
نضرب له الترحيب منا شمامي
يا جنودنا حنا وراكم تهاويل
ماهمنا العدوان شرقٍ وشامي
المملكة في حكم سيد الرجاجيل
المملكة في ظل حزم ونظامي
يا بو فهد ياجعل حكمك تساهيل
أنت الذي للجار نعم المحامي
واحنا جنودك للعدو ندبل الكيل
نخوض نار الحرب لو هي كتامي
وحنا اذا شانت ترانا كما السيل
هذا الوطن يحميه ضرب الحسامي
بحكم شرع الله من غير تضليل
ماهي بزود الهرج والا الجهامي
واللي نوانا بشرّ يلقى البهاذيل
للدار جندٍ للمعادي هدامي
واختامها صلوا على صفوة الجيل
لمحمد المرسول ازكى سلامي
حمد إبراهيم العثمان