دحام بدر الهذال

بعض الهقاوي

ما ينفع الطيب.. باللي ما يفيد الطيب
بعض الجمايل تخّرب بيت صاحبها
نصيحةٍ قلتها من واقع التجريب
واللي يبيها.. يسجّلها ويكتبها
حقيقةٍ شفتها من غير شك وريب
تو الليالي تعلمني تجاربها
الطيب ضايع بشخصٍ ما يعرف العيب
يقصر عن الزين والهقوة يخيبها
ظليل عقلٍ ولا يستاهل التوجيب
وجما يلي فيه ما حسّب عواقبها
والطيب عند الشباب وعند راع الشيب
سلم القبايل.. وفعله ما يعذربها
حقٍ على من لقا في بيتي الترحيب
يذكرني بخير.. لا هبّت هبايبها
خلته تحلاّ بحسن الخلق والتأديب
والمرجله ما هقيت إنه يجنبها
صحيح ما كل رامي يدرك التصويب
لو النياشين قدّامه تقرّبها
أحيان.. بعض الهقاوي بالرجال تخيب
حتى أقرب الناس ما توفي بواجبها
الذيب ما عاد ذاك اللي يسمى ذيب
والعين يعلا نظرها فوق حاجبها
والعبد لو كان يدري في علوم الغيب
ترتاح نفسه ولا تكثر متاعبها
يا طول همي.. بليل الخوف والترهيب
والشمس قفّت عن عيوني ركايبها
تمر الأحداث عندي ما لها ترتيب
والنار تزداد في جوفي لهايبها
كثر المواجع بقلبي تشكي التعذيب
ما عاد أدور وأنشد عن سبايبها
أخشى من اللوم والتحسيف والتأنيب
وادرى خواطر بعض ربعي واراقبها
كله من الطيب باللي ما يفيد الطيب
أثر الجمايل.. تخرب بيت صاحبها