مساعد بن علي القريني

يا سامع القاف

ياللي عباده لها الأرزاق كاتبها
يارب ياالله تنصر دين الاسلامي
وتذل من هو شريعتنا يحاربها
أشوف ناسٍ توجه سير الأقدامي
يم المعاصي موجهة ركايبها
وش ينفع العبد من كثرات الآثامي
كثرات الآثام ما تحمد عواقبها
ياسامع القاف بالله خل الأوهامي
النفس ما دايمٍ تلقى مطالبها
دنياك كم واحد في بحرها عامي
وفي عومته هالته كثرت عجايبها
لو شفت بايامها ضحك وتبسامي
عليك دنيا الشقا هبت هبايبها
دنياك ذا لونها من ماض الاعوامي
برق بميلاتها واسأل مجربها
وعمر الفتى يا فتى لو طال ما دامي
عمرك له نهاية ما هو مجنبها
حافظ على الدين واتبع شرعه السامي
خل الدروب الرديه لا تسير بها
منا همل ناكل ونرقد بلا احكامي
النفس قدامها من هو يحاسبها
الكاسب اللي يقوم ابحج وصيامي
وصلى الفرايض وبالأوقات رتبها
وانصحك يا سامعي في وصل الارحامي
ونفس تطيع الولي ما الله مخيبها
ومالك وما فات خل السير قدامي
لا تنضر الفايت روحك يتعبها
ومن لها استغل الفرص بيعض الأبهامي
الياغدت فرصتك ضاعت مكاسبها
ومن لها خذا المرجله في باد الأيامي
ما ظن في شيبته يقدر يفوز بها
والطيب ما حط له بايع وسوامي
ونفس تبي المرجله محد بحاجبها
واللي على المرجله عازم وجزامي
من غير شور العرب يارد مشاربها
قلته واناصادق ماني بظلامي
والله علم عن خطا نفسي وصايبها
جربت الأيام وأصبح عندي المامي
بامور وعلوم والناس ابتجاربها
واللي له بداية لازم له ختامي
ومثالنا عندنا ختمٍ يناسبها
صلوا على من هزم عباد الأصنامي
محمد شفيع أمته لاجا محاسبها