شتت الحاضر بعنف آلام الأوهامي

طوى عمري مرور الوقت وانزاحت ثمان سنين
وأنا عايش على ذكرى معاها ماتت أحلامي
وقفت أتأمل الماضي وأقول إن الوفاء له دين
ولكن شتت الحاضر بعنف آلام الأوهامي
كسبت من الفراق الهم واتعب ذهني التخمين
ولاني داري(ن) عنها يجوز انستها الأيامي
خذاه الوقت واقفا به ولا عادت تعود تبين
على ماضيه واطلالة تسابق صوبها هيامي
يبس قلبي وشريانه من أيام(ن) مضت للحين
من اللي غيرها يحيي عروق(ن) غصنها ظامي
مثل شي(ن) ملامحه البعيدة ما خذته العين
توازن وانزوت بيني وبينه طول الأعوامي
انا خايف يطوف العمر يبحر بي ولا أدري وين
على ذكرى رواسبها القديمة دوم قدامي
الا يا ليت عن حالي وكل اللي جرى تدرين
بقى جفن الوفاء صاحب لحبك ما بعد نامي