مرحوم يا شيخٍ على الطيب ممشاه

في رثاء الشيخ فلاح بن فيصل بن حشر رحمه الله:
مرحوم يا شيخ على الطيب ممشاه
شيخ المراجل والفعول الجزيله
شيخٍ اليا ضاقت علينا نصيناه
شيخٍ اليا ثقلت يشيل الثقيله
عون الضعيف اللي من الضيم ينخاه
فزعة شرف ماهيب فزعة هزيله
ومن جاه وقف معه بالمال والجاه
دون الجماعة والربع والقبيله
والحمل لمن ثقل ما قال منه آه
يرسي كما ترسي الجبال الطويله
ياكم وياكم لو نعدد مزاياه
مثل البروق ومثل وبل المخيله
يوم الهياثم عزها دوم بحماه
شوفوا الهياثم والفعول الجليله
يلي تبي نبذه عن أصله ومجناه
راجع تواريخ الفحول الأصيله
تشهد لهم خيلٍ من أول معناه
وتشهد لهم ذيك السيوف الصقيله
وما مات من خلف صقورٍ بدنياه
الحر يرث حر قالوا مثيله
وعقب زحول رجال مثله وشرواه
اللي جمعوا علمٍ وحلم وفضيله
وما قدمت يمناك يا العبد تلقاه
وكلن على فعله بيلقى حصيله
لونه يفداء يابو نايف فديناه
لاشك حكم الله ولا فيه حيله
فلاح بن فيصل عسى الخلد مأواه
رحمتك يا من هو ينجي دخيله
عبدالله بن هادي بن القعيمة