ملوك العدالة

يا نجد حظك زين والحمد لله
من عقب أبو تركي رسوا بك عياله
يوم إن أبو تركي بنى الحكم وأرساه
أرساه بايمانه وخيرة رجاله
وحد جزيرتنا بسيفه وشلفاه
على النقا ما جاه حكمه ختاله
حاكم ولا مثله ولا فيه حلياه
لا قال ابن فيصل حمى كل قاله
وولاّ العهد لسعود والحكم يزهاه
شيخ على الشعب السعودي ظلاله
سعود يوم ان المشاكيل تنصاه
ينفق لهم في كل يوم رياله
سعود بالطولات تحمد سجاياه
من راس أبو تركي وعرّب خواله
وولاّ العهد فيصل وللحكم ناداه
وقاد البلد فيصل بعرف وعداله
فيصل بنى الشعب السعودي بيمناه
طور مشاريعه ويرفى خماله
وفي صالح الإسلام سارت به خطاه
زعيم عربٍ في القسا ينعناله
وولاّ العهد خالد وللحكم حياه
خالد حليف الجود لا جاء مجاله
خالد على الناموس والطيب ممشاه
غيثٍ على الشعب السعودي خياله
حاكم وفيه الدين والجود والجاه
عون الضعيف اللي قليلٍ حلاله
وولاّ العهد فهد العروبة وقداه
لا ثارت الهيجاء يوقف لحاله
حلحيل ما ينحال وينوخ إدهاه
ساس الشجاعة كلها والشكاله
فهد عوين اللي من الضيم ينخاه
عونه وعزه لا تلوت حباله
وفهد عضيده في المهمات حياه
وولاّه عهد المملكة وارتكاله
عبدالله الوافي رضا شعبه إمناه
بالدين والدنيا وحزم وجزاله
واليوم هو حاكم وحنا رضيناه
آمين نبطي ماندور بداله
زيزومنا اللي كلنا نتبع رضاه
وحنا جنوده والسعد من خصاله
حنا جنودٍ له وحنا فديناه
يعيش أبو متعب ومنا الثناله
وسلطان جعل الله يحفظه ويرعاه
نايب مليك وطيب الله فاله
هداج تيماء اللي تصدر ظماياه
من ورد له يشرب ويسقي جماله
من مثلهم في الكون في اقصاه وادناه
يقوله المخلص ويثبت مقاله
من مات منهم جنة الخلد مثواه
والحي جعل الله يطول لياله
ويا الله يا اللي تامن الخلق بحماه
تحفظ وطنا من عبث من نوى له
ومن شلة الإرهاب يا رب تاقاه
اللي على الإسلام صاروا عباله
ابن الوطن يشيل شره بمخباه
ويفجر المسلم وييتم عياله
اللي يريد الحق يركد ويلقاه
والعاصي المجرم نجدد نكاله
وختام قولي يا هل الوجه والجاه
أرج السموحه يا ملوك العداله
محمد بن راشد بن كميهان السبيعي