رجل المواقف والفعول الحكيمة

لا والله الا غاب فكاك الأنشاب
رجل المواقف والفعول الحكيمه
سديد رأي إليا عطا رأي أصاب
ادهى الدهاه أرياه دايم سليمه
يوم ان جاره جاه ما صك الابواب
رحب وحيابه بعزم وعزيمه
وجمع جيوش المملكة هي والاجناب
والمعركه حسمت بليا هزيمه
وقضى على الطاغي بعد كل الأتعاب
ورد الكويت بعز عقب الظليمه
وسجل له التاريخ ديوان وكتاب
في توسعة مكه ومعها المدينه
هذا كلام الصدق ما نيب كذاب
والصدق واضح للعقول العليمه
يا رب عضنا فيه يا رب الأرباب
يا رافع سبع وسبع مقيمه
ولا غاب نجم غيره نجوم ما غاب
ماكر حرار ما يهاجم عرينه
قايد مسيرتنا إليا كشر الناب
عبدالله الغالي عسى الله يديمه
للسلم سلم ولا هل الضد حراب
كعام الطغاه أهل القلوب السقيمه
يصفح ويرحم لمن تجاوز اليا تاب
والله يحب أهل القلوب الرحيمه
لا عارضه مشكل يلاقي له اطباب
فاهم ويفهم من رجال فهيمه
وسلطان وجه الخير من جاه ما خاب
مفتاح باب الخير كافل يتيمه
من جاء يعادي له لقا ذل وتراب
عوق الخصيم اليا تطاول خصيمه
حلحيل ما ينحال يحسب له حساب
يا قرد حظ اللي أبو خالد غريمه
هذي مثايل شاعر صاغ باعجاب
أبيات شعر قالها من صميمه
نجدد البيعه شباب وشياب
عهد نصونه من جدود قديمه
لآل السعود اللي لنا درع وحجاب
تعرف اليا جات الأمور الجسيمه
وجيه الحرار الشقر عكفان الأشناب
عدوهم يونس بكبده حريمه
دايم وهم للشعب حلوين واحباب
في ظلهم نلقى حياة كريمه
عيال من أسس بلاده على كتاب
وسيف على يمناه دايم نديمه
قضى على وقت مضى سلب وانهاب
وعشنا بخير ما يعدد نعيمه
والله يجنب دارنا شر الارهاب
ويحفظ مناطق مملكتنا العظيمه
ونامي بأمان الله يا عكش الأهداب
الأمن وافر والسعاده مديمه
وصلاة ربي عد ما سارت ركاب
واعداد ما تمطر وما جات غيمه
على النبي الهاشمي خير الأنساب
محارب الكفار وأهل النميمه