تباشر في قدومه كل سكان السعودية

تولم ياقصيدي والعذر مني ماهو مقبول
حدث ماهو طبيعي فرحةٍ ماهي طبيعية
هذا والله خبر مفروض بأفراحه يحول الحول
تناقله الصحافة والقنوات الفضائية
هذا نايف ولد عبدالعزيز اليا استقر القول
تباشر في قدومه كل سكان السعودية
هذا نايف وزير الداخلية سيفها المسلول
لكل اللي يخالف ماحتوت كتبٍ سماوية
بحكم الله يحارب منكرين الأمن عرض وطول
بدارٍ حكمها واحكامها بأحكام شرعية
أرحب به وأهلي كثر حبٍ بالصدور يجول
هلا يامرحبا ترحيبةٍ ماهيب مقفية
هلا يانايفٍ لك بالقلوب أصدق غلا محمول
هذي كلمات رددها الصحيح وصادق النية
هلا باللي على جزل العطايا والسخا مجبول
حقيقة كل شعب المملكة ماهي خيالية
يرددها الجميع ولا بجودك سيدي مجهول
على وضح النقا جودك يبوح بكل حرية
ياراع الجود جودك للبشر واضح وله مدلول
حملاتٍ للتبرع غير جمعيات خيرية
تقل عن كل مسلم بالبسيطة سيدي مسؤول
أحوال المسلمين بهاجسك ماهيب منسية
بأوامر خادم البيتين من يشكي فقر مكفول
رحلاتٍ عن طريق البر مع رحلات جوية
عسى خير البلاد اللي منه كل العباد تنول
يديمه ربي اللي ميز الحسنة عن السية