ولي العهد عبدالله,, فعوله دوم محموده

للوطن

في يوم الثلاثاء الثامن من رمضان احتفل الحرس الوطني في القطاع الغربي من بلادنا في مناسبة عسكرية كان للشعر حضور فيها حيث ألقى الملازم الشاعر ثواب بن زيد بن نجا الحارثي هذه الملحمة الرائعة.
بدينا بسم من نزل تبارك والصمد والصاد
ولا خاب الذي يبدا بسم ربه ومعبوده
من الشهر الفضيل أحلى الليال اتجدد الميلاد
ويجددها لقانا اللي عسى دايم ايعوده
الا يا جعل كل أيامنا نور وفرح وأعياد
تحت حكم البلاد اللي بحكم الشرع مسيوده
على هذا الحفل دايم مقاديم السعد تزداد
وعم الحفل فرحه توها بالطيب مولوده
هلا يا مرحبا ترحيب وافي واللحون أجداد
أطوعها على كيفي وهي من عرف مردوده
تراحيب باسم فيصل ولد من يكعم الاضداد
تراحيب الوفا والشوق منا ننثر أوروده
انظمها واقيمها واعطرها بورد وكاد
واقدمها ارتجال وكل بيت ننقض اعقوده
تماثيل نقدت ابها نقد ما عابها نقاد
صورها من صميم القلب والوجدان مرصوده
يهيضن الضماير والمشاعر شعرها منقاد
مشاعر صاغها شاعر تحل احبال معقوده
واصوغ امن المعاني عن بلاد العز والأمجاد
اعبرها وانا اعصابي من التعبير مشدوده
عن ابلاد لها حب كبير ابو سط كل افواد
كبير اكبر من اجبال العلا وابان والسوده
بلاد عزها ضافي عليها الامن عم وساد
بحفظ الله وثم اجنوده اللي تحمي احدوده
بلاد المملكة يا عرق وطن غالي واعز ابلاد
صحيح انك وطن شامخ تهز الشوق وتزوده
وطنا يا عسى الله يامنك من دبرة الحساد
تراك انته وطنا اللي جميع ارجاه محسوده
ترى حنا الحرس للمملكة درع وحصن وسناد
مواقفنا على وضح النقا بالعز مشهوده
ترى حنا الحرس لا صار به أخذ وعطا وعناد
نردي حيل من دايم علينا يفتل أعضوده
رجال ما تزعزعنا الاعادي للوغى وراد
ولا به صعب قلنا في نهار الحرب يا كوده
شواهدنا على ساحة ثرا الخفجي بعد ما عاد
وخضنا وقعة تشبه لنوٍ ترجف ارعوده
لنا عزم قوي مختلف لو طبلت بغداد
عوايدنا نسوق المعتدي للموت ونقوده
عطينا العهد للخفجي وجيناها على ميعاد
وقلنا ابشري دام الثقة ما هيب مفقوده
دخلناها واعدناها بقوة يوم ربي راد
وذرينا بعين المعتدي ملحه وباروده
ويحق النا الفخر دايم وحنا للفخر رواد
لنا حظ كبير وبالسعادة ذعذعت نوده
شريعتنا لنا مبدا وهي للمسلمين اعماد
عسى ربي يعز الدين والاسلام وجنوده
اقوله والعوارف تعرف المصدار والميراد
وترا ما يثبت اشداد الجمل لا مالت ابدوده
واقوله والمفاخر تبتغي صبر وجلد وجهاد
وعسى كبد تشيل الحقد باللاهود ملهوده
ترامن هو تمنا حربنا يرجع بدون اشداد
تكبده الخساير والعباير تحرق اخدوده
عليه البيض يلطمن الخدود ويلبس احداد
ولا يهتز موقفنا وسيوف العز مجروده
فلسطين الجريحه مجزرتها تجرح الاكباد
لها خمسين عام والضمير اتبيح اسدوده
فلسطين الجريحه صبرها من ظلم الاعدا باد
تصيح وعالم الاسلام ما قد قامت ارقوده
فلسطين الجريحة عزروها الكفر والالحاد
تناشد في قضيتها وكن ما هيب منشوده
فلسطين الجريحة نصرها دين يبي سداد
عسى الله يقلع اسرائيل قلعة ما لها عوده
متى جمع العروبه ينتفض للقدس لين ايعاد
تحت راية جهاد نيته بالحق معقوده
مثل جمع مضى جا زاحف من يمة الأكراد
على قيادة صلاح اللي تصدا منكسر عوده
بوقعة حصلت منها طيور الحوم ملح وزاد
وطهر مسجد الأقصى من أهل الكفر ويهوده
بجيش تطمح اجنوده تموت أبعز واستشهاد
عسى روحك يا شهم أبجنة الفردوس مخلوده
الا يا دولة اسرائيل لو بنيك طويل وشاد
تراك ابمحكم القرآن بالتنكيل موعوده
وعد بلفور يا سرائيل اسطوره بدون أحياد
وعلى كل الخرايط منتي مرسومه ومعدوده
تجمعتي من أشتات وتربيتي على الأحقاد
بذن ربي بدرك النار يا اسرائيل موروده
وكثير الهرج يا سرائيل وقت ضايع ما فاد
تريدين السلام أبنية قشرا ومقروده
وانا اظن السلام اجموع جيش يمتك ينقاد
يكبعك الصباح اللي به النيران موقوده
يقوده عاهل لامن ذكرته أثبت استعداد
هذا العاهل فهد وان قام قامت جنبه افهوده
حفظك الله مليك لك مواقيف على الاشهاد
مواقيف على الاشهاد ما ثوقه وما كوده
مليك نفتخر به يوم نظراته لهن ابعاد
مليك في سبيل الشرع يبذل كل مجهوده
اعد العز والهيبه لكل المسلمين اعداد
وثم صارت مبانيهم على الايمان مشيوده
فعوله لا ذكرناها ذكرنا طارق بن ازياد
زمان المجد من عصر قديم ايجدد اعهوده
ابو فيصل على حل القضايا المبهمه معتاد
ليانادى المنادي فاللقا ياقو مردوده
يعد امع اول القاده ليا من عدو القياد
عسى ربي يديمه في امان ويرحم اجدوده
وابو متعب عضيده كان صارن الليال احداد
ولي العهد عبدالله فعوله دوم محموده
يديم النا الشجيع ابن الشجيع امعرب الاجداد
بصملاته ووقفاته يهد الجمع ويسوده
شجيع ايورد الهياب بالحنكة فعل وآجاد
شجيع له صعيبات الأمور العوص مسنوده
اله جنب متين يحكم الميقاف ما ينحاد
تنصاه الشعوب اللي من الأيام مضهوده
واخوه النايب الثاني سياسي يحل أقياد
اله يمناً خطيله بالشرف والطيب معهوده
عطاياه الجزيله لو عدن ما لهن اعداد
نعم سلطان ابو خالد يجود الجود من جوده
ونعتز ابمهمات ينجزها وخيره ساد
وجميع اوصاف بذل الخير في سلطان موجوده
وزير شيد احصون الحدود وعن بلاده ذاد
مقابيس العدا بقيادته ورياه مخموده
وهلا باللي يشرفنا حضوره والسعد به زاد
نهلي بالامير ابن الكرام اموفي اوعوده
نهلي به بتشريفه عدد ما يرعد الرعاد
هذا فيصل ومن جاه ونخاه اينول مقصوده
هلا حييت يا فيصل عسى ليل السعد ينعاد
نشوفك كل عام وحفلنا يزداد بسعوده
سموك وان حضر عز وفخر والفضل منك ايقاد
تزود الحفل نور ونور يومك اول اوفوده
وحرسنا فالقطاع الغربي الى حل الصعب له ماد
هذي سبة يمينك يومها للطيب ممدوده
والا يا جعل كل ايامنا نور وفرح وعياد
تحت حكم البلاد اللي بحكم الشرع مسيوده