حلول اللغز

نشرنا في عدد الأسبوع الماضي لغزاً كتبه الشاعر شبيب بن شاهر السبيعي وكان نصه:
أنشدك عن رجلٍ يحفظ المواثيق
سرّه عميق ولا يخلي لزومه
وإن ماتت أمه دوروه المخاليق
وإلى لقوه يجيب خافي علومه
وقد وصلتنا عشرات الحلول وبعد الفرز استحق النشر منها الحلول التالية:
اللغز له رمعه وحله توافيق
عيني تطالع به وفكري يهومه
للطائره حومه وطلعه وتحليق
ونتيجة «الصندوق» شبه محتومه
صويلح بن عبيسان الشيباني / الرياض
أهلا هلا بك عدّ نبت الزماليق
لغز عميق والحروف محكومه
قل لابن شاهر يا عساه التوافيق
صندوقٍ أسود ما يضيع علومه
عبدالله العبدالعزيز / تمير
لتبيب طالع بالنجوم الشواهيق
مابينهن والأرض للغز حومه
صندوق اسود غير بعض الصناديق
لاشك ماكلن يفرج همومه
سليمان بن صالح المدالله / الزلفي
سبحانك المعبود رب المخاليق
الآدمي بالعقل يقضي لزومه
الطايره بالجو تمشي بتحليق
وصندوقها الأسود مخفي علومه
محسن زيد الشهيل / حائل
يالله اللي تفرج الهم والضيق
يا عالم بالكون منشي غيومه
الحل يا بن شاهر تراها صناديق
الوانها سود وتعرف رقومه
عبدالرحمن بن حمود الغنام / الاسياح
يا مرحبا بك يارفيق المطاليق
يا شاعرٍ معروف بانت رسومه
اخذ الجواب وجعلها بالتوافيق
صندوقٍ اسود صادقاتٍ علومه
مطلق بن فالح السبيعي / رماح
أكتب جوابي واوثق الحل توثيق
وأشارك أهل الشعر وأعرف قرومه
يصير في الصندوق الأسود تحاقيق
عن نكبة الطيارة أعطى علومه
ضويان الحسيني الحمادي / عرجاء
حبَّيت أشارك يالرجال المطاليق
في حلْ لغزٍ واضحات رسومه
فالطائرات مصممين الصناديق
يكتب على «الصندوق الأسود» رقومه
يحيى عبدالله الأحمري / الرياض
يالله يا رحمن يافارج الضيق
ترحم نفوس طايرة ومحكومة
واللغز ماظني يبي زود تحقيق
صندوقٍ أسودٍ.. واضحات رسومه
محمد بن حمد البدر / الزلفي
زحمه.. تعب.. يالله طلبت التوافيق
للي حجز للنبك وتجلى همومه
رحله ولاكفت لناساً مشافيق
وصندوقهم ماعاد تقوى عزومه
نايف محمد الاسيد / القريات
حنا على الجزلات دايم مشافيق
واللي يبا الجزلات محدن يلومه
واللي لها في لجة الجو تحليق
لابد ما الصندوق يظهر لزومه
سعد بن مويزر البدراني / الرس
ماني من اللي يعسفون الطواريق
والا الجزيرة غالية وامحشومه
واللي تطير مشابهه للغرانيق
في بطنها صندوقها وامحكومه
سيف مويزر البدراني /الرس
أهلا هلا عداد نظم الطواريق
بالشعر واللي ينظمه من نجومه
السر يحفظ جوف سود الصناديق
اللي على كل العلوم محكومه
جهاد العقيلي
يا رجال ياللي تفهمون الطواريق
عندي علومٍ بالشهود محسومه
عيني تبرق في سما البعد تبريق
لو هي على الصندوق الاسود جزومه
فيصل فهد العمار / الزلفي
يا مرحبا عداد طرق الطواريق
بالشاعر اللي من هل الخير قومه
بالطائره صندوق غير الصناديق
اسود بموت امه يجي قبل يومه
احمد بن شراع الذيابي / أم الدوم
لغز السبيعي واضحٍ للمطاليق
لأهل الذكاء والعرف بانت رسومه
فالطايرة صندوق برمج بتدقيق
يجيب علم الطايره للحكومه
متعب الحميدي الحمادي / عرجاء
يالله يالمطلوب رب المخاليق
ياناشرٍ من فوق خلقه غيومه
والحل معروف وعندي مواثيق
في الطايره صندوق يظهر علومه
ظافي سعود الغياثات / الافلاج
يارب يا رازق جميع المخاليق
ياللي على خلقه وسيعه حلومه
للغز واضح ياهل العرف ويليق
حقايق «الصندوق» تطلع بيومه
خالد بن سالم الهوته / الرياض
قريت لغزك يالسبيعي بتدقيق
وارسلت حله للجزيرة بيومه
الطايره طاحت عقب طول تحليق
وصندوقها جاب السبب في قدومه
عطاالله بن سليمان العطاالله / الزلفي
يامرحبا ترحيبةٍ تذهب الضيق
في صفحة «مخدومة» ومحشومة
واضح جواب اللغز من دون تدقيق
«صندوق أسود» واضحات رسومه
محمد بن سعد بن غشام آل جناح / القويعية
أهلا مع الفنجال والطيب لاسيق
بالشاعر اللي كل عالي يهومه
بالطائره موجود سود الصناديق
بعد التحطم جيب تفحص ارقومه
حسين بن هندي / المحيلاني
قريت لغز للسبيعي بتدقيق
وانشهد ان الطيب دايم سلومه
هذا هو الصندوق فيه المواثيق
بالطايره معروف وتلقى علومه
محمد بن عبدالعزيز الخنيفر / أشيقر
يامرحبا بك عد نبت الزماليق
واعداد نور الصبح ما أعلن قدومه
حنا نقول العلم عقب التحاقيق
صندوقٍ أسود ما خفتنا رسومه