الكاس عيا ما يبي إلا هلاله

الشعراء يتغنون بالزعيم

الانتصار الهلالي المثير دفع عدداً من الشعراء للتفاعل معه عبر قصائد اخترنا أجملها فكانت هذه التظاهرة الشعرية التي تتحدث عن الإنجاز الوطني
اللي سأل منهو يبي ياخذ الكاس
نجوم الأزرق جاوبوا له سؤاله
يوم لعبوا في فن وفي ذوق واحساس
الكاس عيا ما يبي إلا هلاله
زعيمنا في آسيا رافع الراس
هذا اللقب يستاهله يوم ناله
هذا الزعيم اللي حشا ماله أجناس
الفن فنه والعطى من رجاله
بريس النادي كسب كل نوماس
يبذل ومن وقته وجهده وماله
زعيم يهوى الصعب ما يلحقه باس
بالعزم والإصرار حقق مناله
أنا اشهد إن نواف للفن نبراس
إبداع وصال وجال يمنى وشماله
خلى دفاع الخصم بالحيل ينحاس
حمى عرينه واجتهد في مجاله
وكل النجوم إلهم شكر ماله قياس
ما قصروا كلٍ بذل ما بدا له
يقولها اللي جاب حبر وقرطاس
وصور حقيقةٍ ما كذبها خياله
وافخر بها من شان رام الألماس
وأهديها للي للسعد طاب فاله
واهني الجمهور واقولها يا ناس
الكاس عيا ما يبي إلا هلاله